काठमाडौं । नेपाली कम्युनिष्ट पार्टी-नेकपाका संयोजक पुष्पकमल दाहालले सुशीला कार्कीलाई प्रधानमन्त्री बनाउने विषयमा भदौ २६ गते राति नै शीर्ष नेताहरूबीच सहमति भएको दाबी गर्नुभएको छ ।
आइतबार पोखरामा आयोजित प्रदेशस्तरीय एकता सन्देश सभालाई सम्बोधन गर्दै दाहालले आफू र माधवकुमार नेपालसहितले राष्ट्रपतिसँग बसेर उक्त सहमति टुंगो लगाए पनि सरकारले त्यसको हेक्का नराखेको आरोप लगाउनुभयो । उहाँले कार्कीलाई नेतृत्व हस्तान्तरण गर्ने सहमति आफूहरूले नै गरेको दाबी दोहोर्याउँदै सरकारलाई 'स्मरण' गराउनुपर्ने परिस्थिति आएको बताउनुभयो ।
संयोजक दाहालले फागुन २१ मा चुनावको वातावरण तयार गर्न सरकारलाई आग्रह गर्नुभयो । पार्टीका सह-संयोजक माधव कुमार नेपालले फागुन २१ गते निर्वाचन निश्चित हुने विश्वास व्यक्त गर्दै, छिमेकी भारत र चीन पनि निर्वाचनको पक्षमा रहेको दाबी गर्नुभयो ।
