जनकपुर । मधेश प्रदेशका मुख्यमन्त्री जितेन्द्रप्रसाद सोनलले पदबाट राजीनामा दिनुभएको छ ।
शनिबार साँझ विश्वासको मत लिन प्रदेशसभा पुग्नु भएका मुख्यमन्त्री सोनलले विश्वासको मत पाउने सुनिश्चित नदेखेपछि राजीनामा दिनुभएको हो । माओवादी केन्द्रका प्रदेशसभा सदस्य रहबर अन्सारी र माला कर्णले पक्ष-विपक्षमा मतदान नगर्ने उद्घोष गरेसँगै प्रदेश सभामा उहाँले मत नपाउने निश्चित भएको हो ।
सोनल सरकारलाई ५३ मत आवश्यक पर्दथ्यो । तर, सोनललाई मात्र ५२ मत आउने देखिएपछि उहँले राजीनामा दिनुभएको हो । सोनल गत असोज २९ गते ५६ सांसदको समर्थनमा मुख्यमन्त्री पदमा नियुक्त हुनुभएको थियो । मधेश प्रदेश सभामा हाल एक सय चार सदस्य छन् ।
चार जना प्रदेशसभा सदस्य शनिबार अनुपस्थित थिए । यसअघि आजै मुख्यमन्त्री सोनलले सबै प्रदेशसभा सदस्यलाई एक ढिक्का भएर मत दिन अनुरोध गर्नुभएको थियो । मधेश प्रदेशका सांसद रहबर अन्सारीले सबै दल र सांसदहरूको नैतिक धरातल सकिएको भन्दै आफैंले आफैंलाई मुखमा कालोमोसो दलेर विरोध जनाउँदै उहाँले पक्ष-विपक्षमा मत नदिने बताउनुभएको थियो ।
