काठमाडौं । रूपन्देही क्षेत्र नम्बर ३ मा आगामी कात्तिक १७ गते हुने प्रतिनिधिसभा सदस्यका लागि हुने उपनिर्वाचनको सरगर्मी सुरू भइसकेको छ ।
निर्वाचन आयोगले चुनावी कार्यतालिका सार्वजनिक गरेपछि दलहरू उम्मेदवारको खोजीमा लागेका हुन् । आयोगले असोज २१ गते उम्मेदवारी दर्ताको समय तोकेको छ ।
दलहरूले उम्मेदवार सिफारिस गर्न जिल्लालाई भनिसकेका छन् भने उम्मेदवार बन्न चाहनेहरूले पार्टी नेतृत्वलाई रिझाउन सुरू गरेका छन् । तर कुनै पनि दलले अहिलेसम्म उम्मेदवार चयन गरिसकेका छैनन् ।
रूपन्देही क्षेत्र नम्बर ३ मा आउने उपनिर्वाचनका लागि उम्मेदवार चयन गर्न राष्ट्रिय स्वतन्त्र पार्टीले अपनाएको विधि सबैभन्दा धेरै चर्चामा छ । उसो त २०७९ मंसिर ४ गते भएको निर्वाचनमा जित हासिल गरेको राष्ट्रिय प्रजातन्त्र पार्टीमा उम्मेदवार बन्ने आकांक्षीको लस्कर छ।
गत साउन ७ देखि २१ गतेसम्म उम्मेदवारको दरखास्त लिएको रास्वपामा ९ जनाले दाबेदारी प्रस्तुत गरेकोमा उनीहरूबीचमा प्राइमरी इलेक्सन भइसकेको छ। रास्वपाले आइतबार उम्मेदवार टुंगो लगाउने छ ।
२०७९ को निर्वाचनमा बोहरासँग पराजित नेपाली कांग्रेसका नेता बालकृष्ण खाँणले भनेकै नेतालाई उम्मेदवार बनाउने तयारी नेपाली कांग्रेसको छ। बोहराको निधनपछि निर्वाचन आयोगले कात्तिक १७ गते उपनिर्वाचन गराउन लागेको हो ।
कांग्रेसका उम्मेदवार तत्कालीन गृहमन्त्री बालकृष्ण खाँण २६ सय ८१ मत अन्तरले पराजित हुनुभएको थियो । महामन्त्री विश्वप्रकाश शर्मा नेतृत्वको टोलीले रूपन्देहीमा मतदातामा सर्वेक्षण गरेको थियो भने नेता खाँण नै पुगेर पनि मतदातासँग अन्तर्क्रिया भएको थियो ।
सत्तारूढ नेकपा एमालेले पनि उपनिर्वाचन जित्ने गरी उम्मेदवार चयन गर्ने दाबी गरेको छ । अघिल्लो निर्वाचनमा राप्रपालाई सहयोग गरेको एमालेले भदौ १५ गतेसम्म उम्मेदवारको सिफारिस केन्द्रमा पठाउन निर्देशन दिएको छ ।
२०७४ को निवार्चन यता कहिले कांग्रेस त कहिले नेकपा एमालेसँग पालैपालो गठबन्धन गर्दै आएको नेकपा माओवादी केन्द्र पनि यसपटक आफ्नै पार्टीको उम्मेदवार उठाउने तयारीमा छ ।
राष्ट्रिय प्रजातन्त्र पार्टीको जिल्ला समितिले ६ जनाको नाम उम्मेदवारका रूपमा सिफारिस गरेको छ जसमा दीपक बोहोराकै दुई छोराको पनि नाम छ। यसैगरी सागर प्रताप राणा, वसन्तविक्रम शाही, गौरव बोहोरा, प्रज्वल बोहोरा, स्वाती थापा तथा दिलीपकुमार मल्लिकको नाम पनि सिफारिसमा परेको छ ।
उम्मेदवार टुंगो लगाउन अहिले राप्रपाले पार्टी उपाध्यक्ष ध्रुवबहादुर प्रधानलाई खटाएको छ । मधेस केन्द्रित सात दलको संघीय लोकतान्त्रिक मोर्चाले नागरिक उन्मुक्ति पार्टीले छान्ने व्यक्तिलाई साझा उम्मेदवार बनाउने निर्णय गरेको छ । तर मोर्चाको एक घटक जनमत पार्टीले आफ्नै उम्मेदवार उठाउने तयारी गरिरहेको छ ।
