काठमाडौं । प्रधानमन्त्री तथा नेकपा एमालेका अध्यक्ष केपी शर्मा ओलीले पूर्वराष्ट्रपति विद्यादेवी भण्डारीलाई पार्टी राजनीतिमा अघि बढ्नै नदिने रणनीति बलियो बनाउँदै लगेपछि भण्डारी समूह प्रतिवादको तयारीमा जुटेको छ ।
भदौ २० गतेदेखि हुने विधान महाधिवेशन नजिकिँदै गर्दा एमालेमा ध्रुवीकरण तीव्र भएको हो । पूर्वराष्ट्रपति भण्डारी समूह विधान महाधिवेशनमै फरक मत राख्नेसम्मको तयारीमा जुटेको हो । विधान संशोधनमा आएका फरक मतका सुझावलाई एकीकृत गरेर प्रस्तुत गर्ने कसरतसमेत यो समूहले गरेको छ ।
पूर्वराष्ट्रपति विद्यादेवी भण्डारी एमालेको ११औँ महाधिवेशनमा अध्यक्षमा प्रतिपस्पर्धा गर्ने तयारीसहित सक्रिय राजनीतिमा होमिएको घोषणा गरेपछि तेस्रो कार्यकालका अध्यक्ष बन्ने तयारी गरिरहनुभएका केपी शर्मा ओली आक्रामक बन्नुभएको हो ।
गत साउन पहिलो साता बसेको केन्द्रीय समिति बैठकले भण्डारीलाई सक्रिय राजनीतिमा फर्कने बाटो बन्द गरिसकेको छ । त्यसपछि पनि ओलीले पार्टीका नेताहरूसँग सरकारी निवास होस् या पार्टी कार्यालयमा छलफल गर्दै चेतावनीपूर्ण शैलीमा भण्डारीको पक्षमा नलाग्न उर्दी जारी गर्दै आउनुभएको छ ।
बुधबार काठमाडौं जिल्लाबाट प्रतिनिधित्व गर्ने विधान महाधिवेशन प्रतिनिधि तथा इन्चार्जहरूसँग भण्डारीलाई अध्यक्ष बनाउन नसकिने र प्रतिस्पर्धा गरे हार्ने भन्दै उहाँको कित्तामा नलाग्न चेतावनी नै दिनुभयो ।
यद्यपि भण्डारी समूह केन्द्रीय समिति बैठकको निर्णय र ओलीको चेतावनीलाई चुनौती दिँदै अघि बढेको छ । भण्डारीप्रति अध्यक्ष ओलीले दिएको आक्रामक अभिब्यक्तिको पार्टीका संस्थागत फोरमबाटै प्रतिवाद गर्ने चेतावनी उपाध्यक्ष युवराज ज्ञवालीले दिनुभएको छ ।
उहाँले भण्डारीको पार्टी सदस्यताको विषय विधान महाधिवेशन हुँदै ११औं राष्ट्रिय महाधिवेशनमा पनि उठाउने स्पष्ट पार्नुभयो । भण्डारी पक्षले संस्थागत रूपमै पार्टीका विधान महाधिवेशनलगायतका फोरमहरूमा पूर्वराष्ट्रपति सक्रिय राजनीति गर्न पाउनुपर्ने र सदस्यता नवीकरण र रोक्न नमिल्ने विषयलाई जोडदाररूपमा उडाउने तयारी गरेको छ । एमाले उपाध्यक्ष सुरेन्द्र पाण्डे पूर्वराष्ट्रपति भण्डारीको सदस्यता नवीकरण रोक्न नमिल्ने भएकाले यस विषयमा पार्टीभित्र फेरि कुरा उठाउने बताउनुभएको छ ।
भण्डारी पक्षमा खुलेरै लागेका स्थायी समिति सदस्य कर्ण थापाले प्रधानमन्त्री ओलीले सरकारी कार्यालयको दुरूपयोग गरेर नेताहरूलाई बोलाएर थर्काउने गरेको भन्दै त्यसको प्रतिवाद गर्ने चेतावनी दिनुभयो ।
थापाले अध्यक्ष ओलीको कार्यशैलीमाथि प्रश्न उठाउँदै विधान महाधिवेशनमा फरक दस्तावेज ल्याउने तयारी भइरहेको जानकारी दिनुभयो । ओली र भण्डारीलाई मिलाउन दौडधूप गरिरहेका एमाले काठमाडौँ जिल्ला कमिटीका अध्यक्ष दीपक निरौलाले भण्डारीको पार्टी सदस्यता नवीकरण रोक्न नमिल्ने बताउनुभयो ।
बुधबार साँझ बालुवाटारमा भएको भेलामा दुई घण्टा भाषण सुनेर ४८ बुँदामा ओलीको धारणा सामाजिक सञ्जालमार्फत सार्वजनिक गरेका काठमाडौँ जिल्ला कमिटीका अध्यक्ष निरौलाले ओली र भण्डारीलाई ११औँ राष्ट्रिय महाधिवेशनसम्म एकठाउँमा ल्याउने गरी पहल भइरहेको समेत बताउनुभयो ।
कुनै समय एकले अर्कोलाई उच्च पदमा पुर्याउन काँध मिलाएर हिँडेका ओली र भण्डारीबीच अहिले पार्टी अध्यक्ष पदका लागि दरार उत्पन्न भएको हो । पार्टी सदस्यता नवीकरण गर्ने अधिकार हातमा लिएर बसेका ओली र सदस्यता माग्नुपर्ने परिस्थितिमा पुगेकी भण्डारीबीचको राजनीतिक टकराव एमालेको तल्लो तहसम्मै पुगिसकेको छ ।
