काठमाडौं । पूर्वराष्ट्रपति विद्यादेवी भण्डारीले सक्रिय राजनीतिमा फर्कने घोषणा गर्दै समानान्तर गतिविधि गर्न थालेपछि प्रधानमन्त्रीसमेत रहेका एमाले अध्यक्ष केपी शर्मा ओली रक्षात्मक देखिनुभएको छ । भण्डारीको पार्टी सदस्यता नवीकरण नगर्ने निर्णय गराए पनि नेताहरुको चर्को दबाबपछि ओली रक्षात्मक देखिनुभएको हो । भण्डारीलाई पार्टीमा प्रवेश नै गर्न नदिने गतिविधि गर्नुभएका ओली अहिले, आए पनि अध्यक्षमा जित्न र टिक्न नसक्ने टिप्पणी गर्दै रक्षात्मक बन्न थाल्नुभएको छ ।
प्रधानमन्त्री एवं नेकपा एमालेका अध्यक्ष केपी शर्मा ओलीले अनेक उपाय लगाएर पूर्वराष्ट्रपति विद्यादेवी भण्डारीको सदस्या नविकरणलाई अवैधानिक भनिरहनु भएको छ । तर यसलाई न भण्डारीले मान्नु भएको छ । न त ओली नै यो कदमबाटै भण्डारीलाई रोक्न सकिन्छ भन्नेमा ढुक्क हुनुहुन्छ । त्यसैले उहाँ नेता कार्यकर्ता सँगको भेटमा भण्डारीको कुरा निकालि हाल्नु हुन्छ । र उहाँको पक्षमा नलाग्न चेतावनी दिइरहनु हुन्छ ।
बुधबार मात्र प्रधानमन्त्री निवास बालुवाटरमा भेला भएका काठमाडौँ जिल्लाका विधान महाधिवशेन प्रतिनिधि र इन्चार्जहरुसँको संवादले भने अध्यक्ष ओली, भण्डारीलाई रोक्न नसकिने मानसिक अवस्थामा पुगेको देखिन्छ ।
यसबाट उहाँले राजनीतिक रुपमा असुक्षित महसुस गर्नुभएको छ । तेस्रो कार्यकालका लागि अध्यक्ष बन्ने तयारीमा रहनुभएका ओलीले भण्डारीलाई अध्यक्ष दिन नसकिने र चुनाव लडे हार्ने निश्चित रहेको बताउनु भयो ।
यो भनाइ सत्यतामा आधारित दावी हो, चेतावनी हो वा रक्षात्मक डर भविश्यले बताउला । तर प्रधानमन्त्री ओली भण्डारीप्रति आक्रामक देखिनुको मुख्य कारण आफ्नो पद असुरक्षित देख्नु नै हो । दुई वर्षअघिसम्म ओलीले पूर्वराष्ट्रपति भण्डारी सक्रिय राजनीतिमा आएर एमालेको अध्यक्ष र प्रधानमन्त्री पनि हुनसक्ने बताउने गर्नुभएको थियो । तर भण्डारीले सक्रिय राजनीतिमा फर्कने घोषणा गर्दै एमालेको अध्यक्षमा दाबेदारी गरेपछि ओली झस्कनु भएको हो । नेता कार्यकर्तासँग नकारात्मक कुरा गरे पनि उहाँले आफूलाई टक्कर दिने नेताका रुपमा भने भण्डारी मात्र भएको स्वीकार गर्नु भएको बुधबारको सम्बोधनले स्पष्ट पार्छ
उहाँले भण्डारी चुनावी प्रतिस्पर्धामा आए पूर्वउपाध्यक्ष भीम रावलको पथमा पुग्ने टिप्पणी पनि गर्नुभएको छ ।
कार्यकर्तासँग ओलीले जबजका प्रतिपादक मदन भण्डारी निकै जिद्धी भएको र आफू पनि त्यस्तै भएको र मिलेर बसेको उदाहरण दिँदै विद्या र आफू अझै मिल्ने सम्भावना रहेको आशयसमेत व्यक्त गर्नुभएको छ । उहाँले वरिष्ठ उपाध्यक्ष ईश्वर पोखरेलका गतिविधिमाथि पनि कटाक्ष गर्नुभएको छ । विधान महाधिवेशनसम्म पोखरेलको व्यवहार हेरेर आगामी महाधिवेशनमा निर्णय लिने चेतावनी ओलीको छ । यसको अर्थ ओली फकाएर, नभए पेलेरै जाने मनस्थितिमा पुगेको सन्देश दिन थाल्नुभएको देखिन्छ । जहाँ उहाँको रक्षात्मक मनस्थिति पनि झल्किरहेको छ ।
