काठमाडौं । भिजिट भिसा प्रकरणलाई लिएर अवरूद्ध प्रतिनिधिसभा बैठक खोल्नेबारे सत्तारूढ दल नेपाली कांग्रेस, नेकपा एमाले र प्रमुख प्रतिपक्षी दल नेकपा माओवादी केन्द्रबीच सहमति भएको छ ।
मुख्य तीन दलबीच भिजिट भिसा प्रकरणको छानबिन र अध्ययन गर्न उपयुक्त संयन्त्र गठन गर्ने गरी दुई बुँदे सहमति भएको हो ।
यो सहमतिसँगै प्रतिनिधिसभाामा जारी अवरोध हटाउने समझदारी भएको छ । सहमतिपत्रमा नेपाली कांग्रेसका प्रमुख सचेतक श्यामकुमार घिमिरे, नेकपा एमालेका मुख्य सचेतक महेश बर्तौला र माओवादी केन्द्रका प्रमुख सचेतक हितराज पाण्डेले हस्ताक्षर गर्नुभएको छ ।
अर्को प्रतिपक्षी दल राष्ट्रिय स्वतन्त्र पार्टी-रास्वपाले भने सहमतिको विरोध गरेको छ । माओवादी केन्द्रका अध्यक्ष पुष्पकमल दाहालले तीन दलबीच सहमति भएकाले अब प्रतिनिधि सभा बैठकमा आफूहरूले अवरोध नगर्ने बताउनुभयो । उहाँले रास्वपा आफ्नै ढंगले अघि बढ्ने बताउनुभयो ।
भिजिट भिसा प्रकरणले प्रतिनिधि सभा बैठक जेठ १३ गतेदेखि निरन्तर अवरूद्ध हुँदै आएको छ । आज १ बजेका लागि बोलाइएको बैठक सवा ३ बजेसम्मका लागि सारिएको थियो । तर त्यो समयमा पनि बैठक बस्न सकेन ।
