काठमाडौं । नेपाली कांग्रेसका सभापति शेरबहादुर देउवाले पार्टीका निलम्बित सांसदद्वय माया राई र मोहनबहादुर बस्नेतमाथिको मुद्दालाई ठूलो अर्थमा नलिन आग्रह गर्नुभएको छ । शनिबार बानेश्वरमा बसेको संसदीय दलको बैठकमा देउवाले राई र बस्नेतबारेको घटनालाई ठूलो अर्थमा नलिन आग्रह गर्नुभएको पार्टीका प्रमुख सचेतक श्यामकुमार घिमिरेले बताउनुभयो ।
घिमिरेका अनुसार सभापति देउवाले राजनीतिमा यस्तै हुने भन्दै आफूहरू पनि जेल बसेर आएको सांसदहरूलाई स्मरण गराउनुभयो । उहाँले भन्नुभयो, “उहाँहरूको विषयमा पनि सांसदहरूले कुरा उठाउनुभयो । त्यो विषयमा सभापतिज्यूले जवाफ दिनुभयो । राजनीतिमा यस्तै हुन्छ, हामी पनि जेल बसेर आएका हौं, थुनामा बसेर आएका हौं भन्ने कुरा राख्नुभयो । यो विषयलाई ठूलो अर्थमा लिनु हुँदैन, राजनीतिमा हामी पनि बसेका हौं भन्नुभयो ।”
माओवादी केन्द्रसँग गठबन्धन गरेर जाने बारेमा कुनै एजेन्डा नरहेको र कांग्रेसले सरकार परिवर्तनको बारेमा कुनै सोच नराखेको पनि उहाँले बताउनुभयो ।
