धनकुटा । नेपाली कांग्रेसका महामन्त्री गगन थापाले संघीयता ठीक ढंगले हिँड्न नसकेको बताउनुभएको छ । धनकुटामा कार्यकर्ता भेटघाटका क्रममा महामन्त्री थापाले संघीयता अहिले टाउकोले टेकेर हिँडिरहेको टिप्पणी गर्नुभएको हो ।
यतिका धेरै महँगो र जनप्रतिनिधि मुलुकले धान्न नसक्ने उहाँको भनाइ छ । मिलाउनुपर्ने कुरा धेरै भएकाले २०८४ को निर्वाचन अघि संविधान संशोधन अनिवार्य भएको उहाँको भनाइ थियो ।
महामन्त्री थापाले नेपाली कांग्रेसभित्रको गुटबन्दी अन्त्य गर्न अधिवेशन प्रणाली नै फेर्नु पर्ने बताउनुभयो । अधिवेशनका बेला वडादेखि बनेर गएको गुटले कांग्रेसलाई सम्हालेर जान नसकिने उहाँको भनाइ थियो ।
महामन्त्री थापाले भ्रष्टाचारमा मुछिए आफू वा पार्टी सभापति नै भए पनि कारबाहीको भागिदार बन्नुपर्ने बताउनुभयो । अदालतले दण्ड दिएको व्यक्ति बचाउन कांग्रेस सडकमा ननिस्कने उहाँको भनाइ थियो ।
