काठमाडौं । प्रतिनिधिसभा बैठकमा आज प्रधानमन्त्री पुष्पकमल दाहालले सरकारको नीति तथा कार्यक्रममाथि उठेका प्रश्नको जवाफ दिनेछन् । प्रतिनिधिसभा बैठक अपराह्न ४ बजे बस्दैछ ।
सरकारको नीति तथा कार्यक्रममाथि प्रतिनिधिसभा बैठकमा छलफल जारी छ । अपराह्न ४ बजे बस्ने प्रतिनिधिसभा बैठकमा बोल्न बाँकी सांसदले आफ्नो धारणा राख्ने कार्यक्रम छ ।
संसद सचिवालयका महासचिव भरतराज गौतमकाअनुसार नीति तथा कार्यक्रममाथिको छलफल सकिएपछि प्रधानमन्त्री दाहालले सांसदले उठाएका प्रश्नको जवाफ दिने छन् । प्रधानमन्त्रीले जवाफ दिएपछि सांसदहरुबाट प्राप्त संशोधनहरुलाई निर्णयार्थ प्रस्तुत गरिनेछ ।
यसपछि यही जेठ ५ गते राष्ट्रपति रामचन्द्र पौडेलले संघीय संसदको दुवै सदनको संयुक्त बैठकमा प्रस्तुत गरेको सरकारको वार्षिक नीति तथा कार्यक्रम पारित हुनेछ ।
यसअघि शुक्रबारको बैठकमै नीति तथा कार्यक्रम पारित गर्ने तयारी गरिए पनि प्रमुख प्रतिपक्षी नेकपा एमालेको अवरोधका कारण लम्बिएको हो ।
पशुपतिमा लगाइएको जलहरीको विषयलाई लिएर माओवादी सांसद लेखनाथ दाहालले प्रश्न उठाएपछि संदीय मर्यादा नाघेको भन्दै एमाले सांसदहरुले संसद अवरुद्ध पारेका थिए ।
एमाले सांसद प्रतिवादमा उत्रिएपछि सभामुख देवराज घिमिरेले २० मिनेटका लागि स्थगन गरेको बैठक दिनभर अवरुद्ध भएपछि आज अपराह्न ४ बजेसम्म स्थगित गरिएको थियो ।
दलहरुबीच संसद बैठक सञ्चालनका लागि छलफल भएपनि सहमति जुट्न सकेन । आजको बैठक बस्नु अघि सहमति जुट्ने नेताहरुले बताएका छन् । यद्यपि संसदको अवरोध जारी रहे आज पनि नीति तथा कार्यक्रम पारित गर्ने कार्यक्रम प्रभावित हुने देखिएको छ ।
यो पनि...