काठमाडौं । प्रधानमन्त्री पुष्पकमल दाहाल र नेकपा एमालेका अध्यक्ष केपी ओलीबीच भेटवार्ता भएको छ ।
सिंहदरबारमा बिहीबार भएको भेटमा दुई नेताबीच समसामयिक राजनीति तथा संवैधानिक परिषद्को बैठकका विषयमा छलफल भएको थियो ।
भेटमा ओलीले एमाले सचिव टोपबहादुर रायमाझीलाई पक्राउ पुर्जी जारी गरेको विषयमा चासो राखेका थिए । सरकारले स्थानीय तहको बजेट कटौती गरेको विषयमा पनि ओलीले दाहालको ध्यानाकर्षण गराएका थिए ।
भेटपछि सञ्चारकर्मीलाई प्रतिक्रिया दिँदै ओलीले भने, ‘एउटा बहालवाला सांसद, पटकपटक मन्त्री, उपप्रधानमन्त्री भइसकेको मान्छेलाई बाटोबाटै हतकडी लगाउनुपर्दैन । ऊ भागेर कहीँ जाँदैन, त्यसकारण यो निकै रहस्यमय छ ।’
प्रधानमन्त्री दाहाललाई त्यस घटनाबारे ध्यानाकर्षण गराएका अध्यक्ष ओलीले नेपालीलाई नक्कली भुटानी बनाएर अमेरिका पठाउने प्रकरणमा दोषीलाई छोड्न नहुने, तर निर्दोषलाई फसाउन पनि नदिइने जनाए ।
