काठमाडौं । नेपाली कांग्रेसले प्रधानमन्त्री पुष्पकमल दाहाललाई विश्वासको मत दिनेलगायतका विषयमा निर्णय लिन केन्द्रीय कार्यसम्पादन र संसदीय दल कार्यसमितिको बैठक बोलाएको छ ।
शनिबार बसेको पदाधिकारी बैठकले भोलि (आइतबार) केन्द्रीय कार्यसम्पादन समिति र संसदीय दल कार्यसमितिको बैठक बोलाउने निर्णय गरेको हो ।
पदाधिकारी बैठकमा प्रधानमन्त्री दाहाललाई विश्वासको मत दिने र सरकार विस्तारको विषयमा छलफल भएको तर निर्णय नभएको कांग्रेसका प्रमुख सचेतक रमेश लेखकले जानकारी दिए ।
मुख्य सचिव कृष्णप्रसाद पौडेलले आइतबार बिहान १० : ३० बजे नयाँ बानेश्वरस्थित संघीय संसद भवनको शंकर हलमा केन्द्रीय कार्यसम्पादन समिति बैठक बस्ने जानकारी दिएका छन् । बैठकसम्बन्धमा उनले जारी गरेको सूचनामा समितिका पदाधिकारी एवं सदस्यहरुलाई उपस्थित हुन भनिएको छ । यस्तै मध्याह्न १२ बजे संसदीय दल कार्यसमितिको बैठक बोलाइएको छ ।
प्रधानमन्त्री दाहालले चैत ६ गते विश्वासको मत लिने तयारी गरेका छन् । साथै विश्वासको मतपछि मात्रै सरकार विस्तार गर्ने उनको मनस्थिति छ ।
नेपाली कांग्रेससँगको नयाँ राजनीतिक समीकरण बनेपछि एमाले-माओवादी गठबन्धन दुई महिनामै टुटेको थियो । एमाले, राप्रपा, रास्वपा सरकारबाट बाहिरिएपछि नेपाली कांग्रेस, एकीकृत समाजवादीलगायतका दल सरकारमा सहभागी हुने तयारीमा छन् ।
