काठमाडौं । नवनियुक्त परराष्ट्रमन्त्री डा. विमला राई पौडेलले परराष्ट्र मन्त्रालयले जनतामा पुर्याउने सेवा र सुविधा सहज बनाउने प्रतिबद्धता जनाएकी छन् ।
परराष्ट्रमन्त्रीको शपथग्रहणपछि मंगलबार मन्त्रालयमा पदभार सम्हाल्दै उनले जनतामा प्रवाह हुने सेवाको प्रवाहलाई प्रभावकारी बनाउने आफ्नो पहिलो प्राथमिकता रहेको जनाइन् । यस्तै कूटनीतिक नियोगसँगको सहकार्य र विभिन्न देशमा रहेका नेपाली दूतावासहरुमा नेपालीको सहज पहुँच बनाउने आफ्ना तीन प्राथमिकता रहेको शर्माको भनाइ छ ।
‘जनतामा परराष्ट्र मन्त्रालयले पुर्याउने सेवा र सुविधालाई सहज बनाउने मेरो पहिलो प्राथमिकता हुनेछ । दोस्रो प्राथमिकतामा विदेशी कूटनीतिक नियोगहरुसँगको सहकार्य रहनेछ । नेपालको हितमा सम्झौता नगरीकन आफूले विदेशी कूटनीतिक नियोगहरुसँग समन्वय गर्नेछु । तेस्रो प्राथमिकतामा नेपालका विभिन्न देशमा रहेका राजदूतावासमा नेपालीहरुको सहज पहुँच बनाउनेछु,’ उनले भनिन्, ‘नेपालको दूतावासमा मेरो देशका मान्छे आउँदा घरजस्तो फिल गर्नुपर्छ । बाहिर जाँदा नेपालको एम्बेसीभित्र छिर्दा घर महसुस गर्नुपर्छ । हाम्रो दूतावावासमा नेपालीलाई सहज पहुँच गराउन प्रयास गर्नेछु ।’
मन्त्री शर्माले नेपालको हितमा सम्झौता नगरीकन आफूले विदेशी कूटनीतिक नियोगसँग समन्वयको तयारी गरेको पनि जनाइन् । उनले नेपालको परराष्ट्र नीतिलाई स्थिर बनाउन आफ्नो प्रयास रहने बताइन् । मन्त्री शर्माले नेपालको दूतावासमा नेपाली जाँदा घरजस्तो फिल गर्नुपर्ने भन्दै नेपालीहरु बाहिर जाँदा नेपालको एम्बेसीभित्र छिर्दा घर महसुस हुने वातावरण बनाउने प्रतिबद्धता जनाइन् ।
आफूले नीति फेर्ने भन्दा पनि असंलग्न परराष्ट्रनीतिअनुसार अघि बढ्ने उनको प्रतिबद्धता छ । ‘आफू आउनासाथ सबै नीति फेर्नेतिर लाग्दिनँ । नेपालको असंलग्न परराष्ट्रनीति अनुसार अघि बढ्ने हो । मान्छेपिच्छे हाम्रो परराष्ट्र नीति परिवर्तन हुनु हुँदैन,’ उनले भनिन्, ‘यति धेरै विज्ञ यहाँ हुनुहुन्छ । भइरहेका नीतिमा ग्याप छन् भने मिलाउँछौँ । हामी अन्तर्राष्ट्रिय क्षेत्रमा जसरी प्रस्तुत हुन्छौँ हाम्रो इमेज त्यही हो। नेपालको सीमा विवादहरुका विषयमा भने अहिल्यै बोल्नु हतार हुन्छ ।’
