काठमाडौं । कैलालीको टीकापुर हत्याकाण्डमा दोषी ठहर भई जेल सजाय भोगिरहेका नागरिक उन्मुक्ति पार्टीका सल्लाहकार रेशम चौधरीलाई छुटाउने गरी सरकारले अध्यादेश ल्याउने निर्णय गरेको छ ।
आइतबार बसेको मन्त्रिपरिषद् बैठकले राजनीतिक समूहमा आबद्ध रही विभिन्न कसुरमा संलग्न भई जेल सजाय भोगिरहेका कैदीबन्दीको मुद्दा फिर्ताका लागि अध्यादेश ल्याउने निर्णय गरेको हो । यसका लागि सरकारले मुलुकी फौजदारी संहिता संशोधनको तयारी पनि गरेको छ ।
यो अध्यादेशमार्फत रेशम चौधरी तथा सोही घटनामा मुछिएका व्यक्तिहरूले कानुनी उन्मुक्ति पाउनेछन् । अध्यादेश राष्ट्रपतिबाट जारी भएपछि कार्यान्वयनमा आउनेछ ।
नयाँ सरकार गठनमा सहयोग गर्न अहिले नागरिक उन्मुक्ति र जनमत पार्टीले सत्तागठबन्धनसँग मुद्दा फिर्ता र बन्दी रिहाको सर्त राखेका छन् । उनीहरुकै सर्त सम्बोधनका लागि सरकारले अध्यादेश ल्याउने तयारी गरेको हो ।
यस्तै आइतबारको मन्त्रिपरिषद् बैठकले सहरी विकास मन्त्रालयको सचिवमा सुरेश आचार्यलाई नियुक्त गरेको छ ।
