भक्तपुर । आठ रात नौ दिनसम्म विभिन्न जात्रा गरी मनाइएको भक्तपुरको एतिहासिक एवं साँस्कृतिक महत्वको बिस्का जात्रा शनिबार विधिवत रुपमा समापन गरिँदै छ ।
शनिबार साँझ गहिती टोलमा रहेको भैरवनाथको तीन तले रथ तानेपछि जात्रा सकिने गर्दछ । गहिती टोलमा रहेको रथलाई स्थानीयले पहिलो दिन जस्तै आ-आफनै टोलमा लैजान तानातान गरिन्छ । आजको दिनलाई द्यो थाहा विज्याइगु अर्थात् देउतामाथि सवार हुने भनिन्छ।
रथलाई शनिबार विधितव पूजा गरेपछि स्थानीयहरुले दुवै तिर डोरीले तानातान गर्नु नै जात्राको विषेशता हो । शनिबारनै रथ तमारी भन्ने स्थानमा पुराएपछि जात्रा सकिन्छ। यस्तै शनिबार बिहान भक्तपुरको कुमाले टोलमा हात नभएको योसिं द्यो अर्थात् लिङगो ढालिएको छ ।
चैतको अन्तिम दिन दिउँसो प्रजापति समुदायले कुमाले टोलमा जेठा गणेशको मन्दिर परिसरमा उभ्याएको योसिंद्यो शनिबार बिहान स्थानीयले बाजागाजासहित पूजा गरेर डोरीले तानेर ढालेका हुन।
