जाजरकोट । जिल्लामा फैलिँदै गएको अवैध लागूऔषध (अफिम) खेती नियन्त्रण गर्ने अभियानअन्तर्गत जिल्लाका विभिन्न स्थानमा लगाइएको अवैध अफिम प्रहरीले नष्ट गरेको छ ।
जिल्ला सुरक्षा समिति जाजरकोटका प्रमुख, प्रमुख जिल्ला अधिकारी राजु प्रसाद पौडेलको नेतृत्वमा नेपाल प्रहरीलगायत अन्य सुरक्षा निकायका प्रमुख तथा स्थानीय बासिन्दाको सहकार्यमा भेरी नगरपालिका-१ अन्तर्गत मैदे, मैदेचौर, घुईलनेटा र स्याँला क्षेत्रमा करिब ४५ रोपनी क्षेत्रफलमा लगाइएको अवैध अफिम खेती फडानी गरी नष्ट गरिएको हो।
यसैगरी, इलाका प्रहरी कार्यालय दल्लीबाट प्रहरी निरीक्षक किरण सापकोटाको कमान्डमा खटिएको प्रहरी टोलीले नलगाड नगरपालिका-१ का भरकट्टिया र गैरीखर्क क्षेत्रमा करिब १५ रोपनी क्षेत्रफलमा लगाइएको अफिम खेती नष्ट गरेको जनाएको छ।
यस अभियानमार्फत जिल्लामा करिब ६० रोपनी क्षेत्रफलमा लगाइएको अवैध अफिम खेती नष्ट गरिएको हो।
