धनकुटा । कोशी राजमार्गको भेडेटार-चित्रेखण्डमा मालवाहक सवारीसाधन सञ्चालकले भारवहन निर्देशिका पालना नगरेको गुनासो बढेपछि धनकुटा प्रशासनले कडाइ गर्न थालेको छ ।
ट्रक ट्रिपर, मिनीट्रिपर, ट्रेलर, सेमिट्रेलर, ट्रयाकटरजस्ता मालवस्तु ढुवानी गर्ने साधनका चालक र तिनका सहयोगीले मापदण्ड विपरित ‘लोड’ ओससारपसार गर्दा सडक संरचनामा क्षति पुगेको गुनासोपछि प्रमुख जिल्ला अधिकारी विनोदकुमार खड्काको अध्यक्षतामा बसेको बैठकले भारवहन निर्देशिका २०७४ कडाइका साथ पालना गराउने निर्णय गरेको हो ।
भौतिक पूर्वाधार तथा यातायात मन्त्रालयले तयार पारेको सवारी साधनको भारवहन नियमनसम्बन्धी निर्देशिका २०७४ ले गाडीको प्रकार र क्षमता हेरेर अधिकतम २४ टन भारी बोक्न सक्ने व्यवस्था गरेको छ । तर विभिन्न निर्माण आयोजना र उद्योगका मालवाहक गाडीले उक्त व्यवस्था पालना नगरेको गुनासो छ ।
तत्कालका लागि सुनसरी जिल्लासँग समन्वय गरेर सवारीको तौल निरीक्षण तथा अनुगमनको काम अघि बढाइने प्रमुख जिल्ला अधिकारी खड्काले बताउनुभयो । यस्तै अत्यावश्यकबाहेक सडक किनारामा पार्किङ गर्न नदिने, सडकमै बिग्रिएका यातायात र ढुवानीका साधनको उचित व्यवस्थापन गर्न नपाइने निर्णय भएको छ ।
बैठकले ४ दशक पुरानो मूलघाटस्थित तमोरनदी माथिको पक्की पुल जीर्ण बन्दै गएकाले उक्त पुलको मर्मतसम्भार प्रक्रिया अघि बढाउन सडक डिभिजन कार्यालयलाई आग्रहसमेत गरेको छ ।
