काठमाडौं । सुन तस्करी प्रकरणमा पक्राउ परेका पूर्वसभामुख कृष्णबहादुर महराविरूद्ध मुद्दा दर्ता भएको छ ।
पूर्वसभामुख महराविरूद्ध सुन तस्करीको अभियोगमा ८ करोड ५५ लाख २८ हजार ३७४ रूपैयाँ बराबरको बिगो दाबी गर्दै काठमाडौं जिल्ला अदालतमा साेमबार मुद्दा दायर भएको हो। मुद्दामा संगठित अपराधसँगै भन्सार ऐन र सुन तस्करीसम्बन्धी अभियोग पनि दाबी गरिएको छ । संगठित अपराध ऐनअन्तर्गत हदैसम्मको कैद दाबी गरिएको छ ।
जिल्ला अदालत काठमाडौंका सूचना अधिकारी दीपककुमार श्रेष्ठले महराविरूद्ध साेमबार मुद्दा दर्ता भएको र बयान तथा थुनछेक भोलि अर्थात् मंगलबार हुने जानकारी दिनुभयो । चिनियाँ संगठित गिरोहसँग मिलेर सुन तस्करी गरेको आरोपमा महरालाई प्रहरीले आइतबार पक्राउ गरेको थियो ।
विद्युतीय चुरोट (भेप) मा लुकाएर सुन तस्करी गराएको आरोपमा महरा २०७९ मै अनुसन्धानमा तानिनुभएको थियो ।
