इलाम । नेपाली सेनाको हेलिकप्टरबाट मंगलबार दुई जना विरामीलाई इलमाको माईजोगमाई-६ प्याङबाट उद्धार गरिएको छ ।
एकजना गर्भवती महिला र अर्का एक सिकिस्त विरामीलाई उद्धार गरी कोशी अञ्चल अस्पताल लगिएको इलामको गडिथुम्कास्थित नेपाली सेनाको रणशार्दुल गणका प्रमुख प्रल्हाद घलेले जानकारी दिनुभयो । हरिमाया थापा र नीरू लिम्बुलाई अस्पताल पुर्याइएको हो ।
असोज १८ को विषण वर्षापछि इलामको सडक सञ्जाल तहसनहस भएको छ । १९ गतेदेखि नै सेनाको हेलिकप्टरले घाइते र सिकिस्त विरामीको उद्धार गरिरहेको छ । १९ गते माङसेवुङबाट ३ जना, २० गते सन्दकपुरको मावुवाट ४, माईजोगमाई-५ सिरिशेबाट १ र भित्तेबाट १ जनालाई अस्पताल पुर्याइएको थियो ।
गर्भवती, प्रकोपका घाइते र गम्भीर विरामीलाई अरू माध्यमबाट अस्पताल पुर्याउन नसकिने अवस्थामा सेनाको हेलिकप्टर प्रयोग गरिने गणपती घलेले बताउनु भयो ।
