काठमाडौं । मेची राजमार्गको राजदुवालीबाट सदरमुकाम इलाम बजारसम्म नि:शुल्क यातायात सेवा सुरू गरिएको छ ।
सवारीसाधनले आफुखुसी भाडा असुलेको गुनासो बढेपछि विभिन्न संस्था र व्यक्तिले नि:शुल्क सेवा दिएका हुन् । माईखोला पुल पारीबाट राजदुवालीसम्मको डेढ किलोमिटर सडक पहिरोले अवरूद्ध छ । त्यहाँबाट सदरमुकामसम्मको १० किलोमिटर दूरीमा नि:शुल्क यातायात सञ्चालनमा ल्याइएको हो ।
इलाम नगरपालिका, इलाम उद्योग वाणिज्य संघ, यातायात व्यवसायीका संघ/संस्था र रेडक्रसमा उपसभापति रतन चौधरीले नि:शुल्क सेवा प्रदान गरेका हुन् । यसैबीच इलामको इङ्ला खोलाले बगाएर बेपत्ता भएका सन्दकपुर-५ इङलाका २४ वर्षीय प्रवेश गुरूङको शव फेला परेको वडा सदस्य कुमार गुरूङले जानकारी दिनुभयो।
योसँगै इलाममा बाढीपहिरोबाट मृत्यु हुनेको संख्या ३९ पुगेको छ । इलाम नगरपालिका-६ का महेन्द्र लिम्बु वेपत्ता छन् । उनलाई पहिरोले घरसहित बगाएको थियो ।
