काठमाडौं । सशस्त्र प्रहरी बल नेपाल नं. १ गुल्म मुख्यालय कञ्चनजङ्घाले बुधबार ताप्लेजुङको फुङलिङस्थित भानुजन माध्यमिक विद्यालयमा मानव बेचबिखनसम्बन्धी सचेतनामूलक अभिमुखीकरण कार्यक्रम सम्पन्न गरेको छ।
गुल्मपति सशस्त्र प्रहरी नायव उपरीक्षक प्रमोदप्रकाश पाठकको नेतृत्वमा खटिएको टोलीले विद्यालयका ६४ जना विद्यार्थीलाई उक्त अभिमुखीकरण गराएको हो। सहभागीमध्ये ३३ जना छात्रा र ३१ जना छात्र रहेका थिए।
कार्यक्रममा मानव बेचबिखन तथा ओसारपसारलाई मानवताविरूद्धको जघन्य अपराधको रूपमा व्याख्या गर्दै यसको स्वरूप र परिणामबारे जानकारी दिइएको थियो। मानव बेचबिखन भन्नाले व्यक्तिलाई झुक्याउने, धम्क्याउने, प्रलोभनमा पार्ने वा अन्य तरिकाले शोषण गर्ने उद्देश्यले एक स्थानबाट अर्को स्थानमा लैजाने क्रियाकलापलाई बुझिन्छ। यसअन्तर्गत श्रम शोषण, यौन शोषण, जबर्जस्ती विवाह, अङ्ग प्रत्यारोपणलगायतका कार्य पर्दछन्।
नेपालबाट विशेषगरी भारत, खाडी मुलुक, अफ्रिकी देशहरू, युरोपेली तथा अमेरिकी मुलुकहरूमा विभिन्न स्वरूपमा मानव बेचबिखन तथा ओसारपसारका घटना भइरहेका छन्। गरिबी र बेरोजगारीलाई यसको प्रमुख कारणका रूपमा लिइन्छ।
मानव बेचबिखन नियन्त्रणका लागि जनचेतनामूलक कार्यक्रम र अन्तरदेशीय सीमा क्षेत्रमा कडाइका साथ जाँचलाई प्रभावकारी उपायका रूपमा औंल्याइन्छ। विद्यालय तहदेखि नै सचेतना अभिवृद्धि गर्न सकिने भएकाले विद्यार्थीमार्फत अभिभावक र समुदायसम्म सन्देश फैलाउने उद्देश्यले यो कार्यक्रम गरिएको सशस्त्र प्रहरी बल नेपाल नं। १ गुल्म मुख्यालय कञ्चनजङ्घाले जनाएको छ।
