संखुवासभा । कोशी राजमार्ग अन्तर्गत संखुवासभाको भोटखोला गाउँपालिका-३ सोम्बुङ डाँडामा सुख्खा पहिरो खसेको छ ।
शुक्रबार ११ बजे सडकभन्दा माथिबाट खसेको सुख्खा पहिरोले सडक अवरुद्ध भएको प्रहरीले जनाएको छ । जिल्ला प्रहरी निरीक्षक रामकुमार लामिछानेका अनुसार पहिरो खसेपछी खाँदवारीबाट भोटखोलाको च्याम्ताङ जाने यातायातका साधन वारपार गर्न सकेको छैन ।
करिव ३५ मिटर माथिबाट खसेको सुख्खा पहिरोले २० मिटर भन्दा बढी कच्ची सडक अवरुद्ध पारेको छ । इलाका प्रहरी कार्यालय हटिया गोलाबाट गएको प्रहरी टोलीले र स्थानीय मिलेर पहिरो हटाउने प्रयास गरिरहेको छ ।
भोटखोला गाउँपालिकाको केन्द्रबाट पहिरो गएको स्थान करिब ९ किलोमिटर टाढा पर्छ । पहिरो खसेको सडक खण्डमा उत्तर दक्षिण कोसी सडकले डोजर पठाएर मर्मत गर्ने जनाएको छ ।
