सुनसरी । मोरङको उर्लाबारीमा मोटरसाइकल दुर्घटना हुँदा २ जनाको मृत्यु भएको छ ।
पूर्वपश्चिम राजमार्गस्थित मोरङको उर्लाबारी-३ नयाँ मङ्गलबारेमा बिहीबार साँझ मोटरसाइकल दुर्घटना हुँदा २ जनाको मृत्यु भएको छ भने २ जना गम्भीर घाइते भएका छन् ।
पथरीबाट उर्लाबारीतर्फ जाँदै गरेको प्र. १-०२-०५० प ८४०६ न.को मोटरसाइकल र उर्लाबारीबाट पथरी तर्फ आउँदै गरेको प्र. १-०२-०४३ प ९२२६ न.को मोटरसाइकल एक आपसमा ठक्कर खाएर दुर्घटना हुँदा ४ जना घाइते भएका थिए ।
घाइतेमध्ये दुई जनालाई अस्पताल पुर्याउनासाथ चिकित्सकले मृत घोषणा गरेको कोशी प्रदेश ट्राफिक प्रहरी कार्यालय इटहरीले जानकारी दिएको छ ।
मृतकहरूमा मोरङको पथरीशनिश्चरे नगरपालिका ५ बस्ने अन्दाजी ४०/४२ वर्षको दीपक धिमाल र मोरङ कानेपोखरी ४ रमाइलो बस्ने अन्दाजी २७/२८ वर्षको किशोर गुरुङ रहेको प्रहरीले जनाएको छ ।
धिमाललाई अरनिको अस्पताल उर्लाबारी र गुरुङलाई मदन भण्डारी अस्पताल तथा ट्रमा सेन्टर मङ्गलबारेले अस्पताल पुर्याएपछि मृतक घोषणा गरेको प्रहरीले जनाएको छ ।
दुर्घटनामा गम्भीर घाइते भएका अन्दाजी २५/३० वर्षका अमृत लिम्बु र ४०/४२ वर्षका विष्णु धिमाललाई थप उपचारका लागि बीएण्डसी अस्पताल बिर्तामोड झापा पठाइएको कोशी प्रदेश ट्राफिक प्रहरी कार्यालय इटहरीले जनाएको छ । घाइते दुवै जनाको ठेगाना भने खुल्न नसकेको प्रहरीले जनाएको छ ।
