काठमाडौं । हिन्दु धर्मावलम्बीहरुले आज घरघरमा तुलसीको विरुवा रोपेर हरिशयनी एकादशी पर्व मनाउँदै छन् ।
आषाढ शुक्ल एकादशीलाई हरिशयनी एकादशी भनिन्छ र यो दिन तुलसीको विरुवा रोप्ने गरिन्छ । घरको आँगनमा तुलसीको मठ स्थापना गरी तुलसीको विरुवा रोप्दा देवताको बास हुन्छ भन्ने धार्मिक विश्वास रहेको छ ।
एकादशीकै दिन भगवान विष्णुको पूजा गर्दा मनोकामना पूरा हुने जनविश्वास छ । हरिशयनी एकादशीको दिन भगवान हरि क्षीर सागरमा शयन हुने र कार्तिक शुक्ल एकादशी अर्थात हरिवोधनी एकादशीको दिन जागा हुने विश्वास पनि रहेको छ ।
हरिशयनी एकादशीका अवसरमा आज बिहानैदेखि फर्पिङस्थित शेषनारायण मन्दिर, बुढानीलकण्ठसहित देशका विभिन्न स्थानमा रहेका भगवान विष्णुका मन्दिर तथा नदी किनारमा दर्शनार्थीको घुइँचो लागेको छ ।