काठमाडौं । नेपाल विज्ञापन संघ, राष्ट्रिय विज्ञापन संघ नेपाल, नेपाल मिडिया सोसाइटी र मिडिया एलायन्सबीच आचारसंहिता सम्झौतापत्रमा हस्ताक्षर भएको छ । विज्ञापन एजेन्सीहरुका छाता संगठन र मुलधारका मिडिया संस्थाका छाता संगठनबीच आचारसंहिता लागु गर्न व्यवसायिक सम्झौतापत्रमा हस्ताक्षर भएको हो ।
सम्झौतापत्रमा विज्ञापनसम्बन्धी कारोवार व्यवस्थापन तथा अनुगमन कार्यविधि बनाएर लागु गर्ने उल्लेख गरिएको छ । सरकारी निकायहरुले गर्ने विज्ञापन वापत सरकारी ढुकुटीबाट भैरहेको खर्च र सञ्चार माध्यमले पाइरहेको रकमबीच धेरै अन्तर रहेको र अधिकांश रकम अनुचित तवरबाट बिचैमा गायब भइराखेको गुनासो हुने गरेको छ ।
व्यावसायिक साझेदारीसम्बन्धी सम्झौतापत्रको उद्देश्य मूलधारका सञ्चारमाध्यमहरुमा विज्ञापन कारोबार गर्दा सम्बन्धन प्राप्त एजेन्सीसँग मात्र हुनुपर्ने भन्ने हो । यसले विज्ञापन दररेटमा चलिरहेको विकृति रोकिने विश्वास साझेदार संस्थाहरुले गरेका छन् ।
