काठमाडौं । नेपाली कांग्रेसका सांसद कृष्णप्रसाद सिटौलाले निजामती सेवामा अनिवार्य अवकाशको उमेर हद ५८ वर्षबाट ५९ बनाउने सरकारको प्रस्ताव मान्न प्रतिपक्षी दलहरूलाई आग्रह गर्नुभएको छ ।
सोमबार बसेको विधायन व्यवस्थापन समितिको बैठकमा भएको संघिय निजामति सेवा विधेयक सम्बन्धी छलफलमा उहाँले यस्तो आग्रह गर्नुभएको हो । सत्तारूढ दल नेकपा एमालेका सांसदहरूले कुलिङ अफ पिरियड नराख्ने गरी संसोधन प्रस्ताव हालेको उल्लेख गर्नुहुँदै उहाँले एमाले यसबाट पछि हटेको बताउनु भयो ।
कुलिङ अफ पिरियड राख्ने कुरामा समेत सर्वसहमति भएकोले उमेरहदको विषयमा पनि धेरै विवाद गर्न नहुनेमा उहाँले जोड दिनुभयो । उहाँले संघीय निजामति ऐन २०८१ सालमा नै बनेको भए यसबेला ५९ वर्ष नै उमेरहद कायम हुने पनि उल्लेख गर्नुभयो ।
प्रतिनिधि सभाले बनाएको कानूनलाई आधार मानेर हेर्ने हो भनेपनि अहिले राष्ट्रिय सभाले ५९ वर्ष राख्दा फरक नपर्ने उहाँको भनाइ छ । उहाँले प्रतिनिधि सभाले पारित गरेका कतिपय विषय राष्ट्रिय सभाले परिवर्तन गरेको पनि बताउनु भयो ।
उहाँले विपक्षी दलहरूलाई निजामती सेवामा अनिवार्य अवकाशको उमेरहद ५८ वर्षबाट ५९ बनाउने सरकारको प्रस्तावमा कम्प्रमाईज गर्दा केही नोक्सान नहुने बताउनु भयो ।
