झापा । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले गैरआवासीय नेपालीहरूको वंशजको नागरिकताले निरन्तरता पाउनुपर्ने माग गर्नुभएको छ ।
पार्टीको जिल्ला कार्यसमितिद्वारा आइतबार बिर्तामोडमा आयोजित पत्रकार सम्मेलनमा उहाँले विदेशमा बसोबास गरिरहेका नेपालीहरूलाई नेपालको समृद्धिमा जोड्नका लागि उनीहरूको वंशजको नागरिकताले निरन्तरता पाउनुपर्ने तर्क गर्नुभयो ।
उहाँले भन्नुभयो, “नेपाल बाहिर पनि नेपाल छ, प्रवासका रहेका नेपाली भूगोलभन्दा बाहिर छन् । उहाँहरूलाई पनि नेपालको चिन्ता छ ।”
विसं २०६३/६३ को राजनीतिक परिवर्तनपछि आएको नागरिकता ऐनको संशोधनमा दोहोरो नागरिकता राख्न नपाउने प्रावधानले विदेशमा कमाउन, अध्ययन गर्न र रोजगारीको खोजीमा पुगेका वंशजका नेपाली नागरिकलाई ठूलो असर पुर्याएको उहाँको भनाइ छ ।
“अवसरको खोजी र उच्च शिक्षाका लागि विभिन्न देश पुगेका नेपालीले सम्बन्धित देशकै नागरिकता लिएका हुन्”, उहाँले भन्नुभयो, “दीर्घकालीन रूपमा काम गर्ने हो भने उताको देशले नागरिकता लिनुपर्छ भनेको हो ।”
