विराटनगर/ दिगो फोहोरमैला ब्यवस्थापनका लागि कोशी प्रदेश सरकार र मोरङ जिल्लाका चार तथा इलामका दुई स्थानीय तहबिच सम्झौता भएको छ ।
कोशी प्रदेश सरकार भौतिक पूर्वाधार विकास मन्त्रालय, विराटनगर र मोरङ जिल्लाका रङ्गेली नगरपालिका, सुनवर्षी नगरपालिका, कानेपोखरी गाउँपालिका तथा धनपालथान गाउँपालिकाबिच फोहोरमैला व्यवस्थापन रणनीतिक साझेदारी कार्यक्रमबारेको समझदारी पत्रमा शुक्रबार हस्ताक्षर भएको हो ।
इलामको सूर्योदय नगरपालिका र रोङ गाउँपालिकाले पनि समझदारी पत्रमा हस्ताक्षर गरेका छन् । मोरङका चार पालिकाको फोहोर मैला व्यवस्थापन केन्द्र रंगेली नगरपालिकामा हुनेछ भने इलामका दुई पालिकाको केन्द्र सूर्योदय नगरपालिकामा रहने जनाएको छ । फोहोरमैला व्यवस्थापनका लागि यो साझेदारीले प्रदेशलाई स्वच्छ, सुन्दर र स्वस्थ बनाउने लक्ष्य लिएको कोशी प्रदेशका भौतिक पूर्वाधार मन्त्री भुपेन्द्र राईले बताउनुभयो ।
नेपालको संविधानको धारा ५७ ले स्थानीय तहलाई दिएको सरसफाइ सम्बन्धी अधिकारको प्रत्याभूत गर्दै कोशी प्रदेशको फोहोरमैला ब्यवस्थापन नीति तथा कार्यक्रम २०७७ बमोजिम दिगो र आधुनिक फोहोरमैला व्यवस्थापन प्रणाली स्थापना गर्नु यस साझेदारीको मुख्य उद्देश्य हो । भौतिक पूर्वाधार विकास मन्त्रालयले यस परियोजनाको मुख्य कार्यान्वयनकर्ताको रूपमा भूमिका खेल्नेछ ।
मन्त्रालयले विस्तृत परियोजना प्रतिवेदन (डिपिआर) वातावरणीय प्रभाव मूल्याङ्कन, बजेट व्यवस्थापन, प्राविधिक सहयोग र आवश्यक पूर्वाधार विकासमा सहयोग पुर्याउने छ । कोशी प्रदेशका ६ वटै स्थानीय तहको फोहोर व्यवस्थापनका लागि एकीकृत फोहोरमैला प्रशोधन केन्द्र र ल्यान्डफिल साइट निर्माण गर्ने अवधारणालाई अगाडि बढाएको छ । यसबाट फोहोरलाई पुनः प्रयोग, प्रशोधन र व्यवस्थापन गरी वातावरणमैत्री बनाउन मद्दत पुग्नेछ । प्रदेश सरकारले डिपिआरको लागत मूल्य अनुसार एउटा फोहोरमैला व्यवस्थापन केन्द्रका लागि बढीमा पाँच करोड, स्विस कन्ट्याक्टले दुई करोड रुपैयाँ लगानी गर्ने र बाँकी व्यवस्थापन स्थानीय तहले गर्नुपर्ने भौतिक पूर्वाधार तथा विकास मन्त्रालय कोशीका निमित्त सचिव रमेश श्रेष्ठले जानकारी दिनुभयो ।
