धनकुटा । सघन शहरी तथा भवन निर्माण आयोजना धनकुटाले वर्षौँ अघि ठेक्का लागेर पनि निर्माण सम्पन्न नभएका स्वास्थ्य संस्थाका रूग्ण भवन आयोजना सम्पन्न गरि हस्तान्तरण गरेको छ ।
चालु आर्थिक वर्ष २०८१/०८२ मा कार्यालयले २०७५ सालमै निर्माण सम्झौता भइ रूग्ण आयोजनाका रूपमा रहेको ५० शैय्या क्षमताको संखुवासभा जिल्ला अस्पताल र रक्त सञ्चार सेवा खाँदवारी भवन निर्माण पुरा गरी हस्तान्तरण गरेको छ।
यस्तै धनकुटाको मारेककटहरे, मूर्तिढुंगा तथा तेह्रथुमको इसिवु र थोक्लुङ स्वास्थ्य केन्द्र हस्तान्तरण गरिएको हो । आयोजनाअन्तर्गत धनकुटासहित कोशी पहाडका तेह्रथुम, भोजपुर, संखुवासभा जिल्लामा दर्जन बढी आयोजना निर्माण पुरा हुन नसकि अलपत्र थिए । पटक-पटक म्याद थप गर्दा पनि निर्माण व्यवसायीले काम सम्पन्न गर्न नसक्दा स्वास्थ्य पूर्वाधार भवन अलपत्र थिए ।
निर्माण व्यवसायीलाई ताकेता र ठेक्का सम्झौता अन्त्य गरी कालो सूचीमा राख्ने प्रकृया अघि बढाइए पछि निर्माण व्यवसायीहरू सम्पर्कमा आएर काम सम्पन्न गरेको आयोजना प्रमुख सुमनकुमार मिश्रको भनाइ छ।
