हुम्ला । कर्णाली प्रदेशको विकट हिमाली जिल्ला हुम्लाको सदरमुकाम सिमकोट राष्ट्रिय सडक सञ्जालमा जोडिएको छ ।
झण्डै साढे ६ करोड रुपैयाँ लागतमा नेपाली सेनाले ४० दिन लगाएर बेलिब्रिज निर्माण गरेसँगै हुम्ली नागरिकको राष्ट्रिय सडक सञ्जालसँग जोडिने सपना पूरा भएको हो ।
हुम्लाको खार्पुनाथ गाउँपालिका-५ खार्पुमा नेपाली सेनाले बनाएको बेलिब्रिजको आज प्रधानमन्त्री केपी शर्मा ओलीले उद्घाटन गर्दै हुनुहुन्छ । पुल उद्घाटनका लागि प्रधानमन्त्री ओलीका साथमा भौतिक पूर्वाधार तथा यातायात मन्त्री देवेन्द्र दाहाल पनि हुम्ला पुग्नु हुनेछ ।
ओलीले पुल उद्घाटन गरेसँगै हुम्ला सदरमुकाम सिमकोट राष्ट्रिय सडक सञ्जालमा जोडिने छ। राष्ट्रिय सडक सञ्जालमा नजोडिएको हुम्लामात्रै एउटा जिल्ला हो ।
पुल जोडिएसँगै कर्णाली करिडोर सिधा सञ्चालनमा आउनेछ । पुलले सिमकोटलाई कर्णाली करिडोरसँग जोड्दै देशको उत्तर-दक्षिण यातायातको ऐतिहासिक ढोका खोलेको छ। योसँगै हुम्ला सदरमुकाम सिमकोट राष्ट्रिय सडक सञ्जालसँग जोडिनका लागि २७ वर्षको प्रतीक्षा पुरा भएको छ ।
पुल सञ्चालनमा आएपछि भारतको रूपैडिया नाकादेखि चीनको हिल्सा सीमासम्म एउटै गाडीमा सिधा यात्रा गर्न सकिनेछ। यसले स्थानीय यातायात, व्यापार, खाद्यान्न आपूर्ति र पर्यटन क्षेत्रमा नयाँ सम्भावना सिर्जना गर्ने विश्वास गरिएको छ।
.jpg&w=400&height=300)
