सर्लाही । 'लिटिल बुद्ध' नामले परिचित रामबहादुर बम्जन भनिने रामलाल बम्जनलाई पुनः कारागार चलान गरिएको छ ।
बम्जनलाई सम्पत्ति शुद्धिकरण मुद्दामा जिल्ला अदालत सर्लाहीले पुर्पक्षकालागि कारगार चलान गर्न आदेश दिएको हो ।
न्यायाधीश जीवनकुमार भण्डारीको इजलासले उनलाई पुर्पक्षका लागि थुनामा पठाउने आदेश गरेको सर्लाही जिल्ला अदालतका सूचना अधिकारी सिकिन्दर कापरले जानकारी दिनुभयो ।
हिजो साँझ अदालतको आदेश बमोजिम बम्जनलाई राति नै सर्लाही सदरमुकाम मलंगवास्थित कारागारमा चलान गरिसकिएको प्रहरीले जनाएको छ । बम्जनमाथि गएको फागुन ५ गते अदालतमा सम्पत्ति शुद्धिकरण मुद्दा दर्ता भएको थियो ।
यसअघि सर्लाही जिल्ला अदालतले उनीमाथी यौन दुराचार मुद्दामा २०८१ असार १० गते १० वर्ष कैद र पाँच लाख रूपैयाँ क्षतिपूर्तिको सजाय तोकेको थियो । उच्च अदालत जनकपुरले गएको चैत ६ गते सर्लाही जिल्ला अदालतको फैसला उल्ट्याउँदै बम्जनलाई कारागारमुक्त गरेको थियो ।
मुद्दा सुनुवाईको क्रममा विवादित धर्मगुरू बम्जनका अनुयायीहरू जिल्ला अदालत अगाडि भेला भएका थिए ।
