सिरहा । सिरहाको अर्नमा गाउँपालिकाले आगामी आर्थिक वर्ष २०८२/८३ को नीति तथा कार्यक्रम सार्वजनिक गरेको छ । गाउँपालिकाले बिहीबारदेखि सुरू गरेको ११औं अधिवेशनमा नीति तथा कार्यक्रम सार्वजनिक गरेको हो ।
गाउँपालिकाले चालू आर्थिक वर्षका अधिकांश कार्यक्रमलाई निरन्तरता दिँदै शिक्षा, स्वास्थ्य, कृषि र पूर्वाधार विकासलाई प्राथमिकतामा राखेको छ । गाउँपालिका अध्यक्ष अशोक यादवले नीति तथा कार्यक्रम प्रस्तुत गर्दै आगामी आर्थिक वर्ष गाउँपालिकाका लागि विशेष हुने प्रतिवद्धता व्यक्त गर्नुभयो ।
गाउँपालिकाको नीति तथा कार्यक्रम नागरिकको आकांक्षा पूरा गर्ने दिशातर्फ केन्द्रित रहेको बताउँदै यादवले नागरिकले अनुभूति गर्नेगरी कार्यान्वयन हुने बताउनुभयो । सामुदायिक विद्यालयको भौतिक तथा शैक्षिक गुणस्तर सुधारका लागि विशेष अभियान सञ्चालन गरिने उहाँको भनाइ छ ।
यस्तै, पालिकाका सरकारी स्वास्थ्य संस्थाहरूलाई बैज्ञानिक ढंगले स्तरोन्नति र विकास गर्न विज्ञहरूसँग छलफल भइरहेको बताउँदै उहाँले अस्पताललाई नागरिकको भरोसालायक बनाउने बताउनुभयो । यसैगरी, कृषिलाई किसानका लागि गर्वलायक पेशा बनाउन पालिकाले किसानको हातमा हात मिलाएर साथ उभिने उहाँले जनाउनुभयो ।
लैंगिक हिंसा न्यूनीकरण र दाइजो प्रचलन न्यूनीकरण उन्मुख कार्यक्रमहरू सञ्चालन गरिने, महिलाहरूमा रहेका परम्परागत सीप प्रवर्द्धन गर्नुको साथै महिला उद्यमशीलता प्रवर्द्धन गर्ने कार्यक्रमहरू सञ्चालन गरिने पनि नीति तथा कार्यक्रममा समेटिएको छ ।
भूमिहीन, अव्यवस्थित बसोबासी र सुकुम्बासीलाई सुरक्षित बसोबासको लागि संघीय र प्रदेश सरकारसँग सहकार्य गरिनेलगायतका विषय पनि नीति तथा कार्यक्रममा उल्लेख छ । गाउँपालिका अध्यक्ष यादवले नीति तथा कार्यक्रममा आवश्यक सल्लाह सुझावका लागि पनि सबै पक्षसँग आग्रह गर्नभएको छ।
