काभ्रे । काभ्रेको नालामा बुबाले चलाएको ट्रकले किचेर छोरीको ज्यान गएको छ । बनेपा नगरपालिका- ४ मा बा४ख ८५९२ नम्बरको ट्रकले किच्दा चालक सरोज बरालकी ३ वर्षकी छोरी समीक्षा बरालको मृत्यु भएको हो ।
सिन्धुलीको गोलन्जोर गाउँपालिका- १ घर भएका बराल नालामा परिवार सहित बस्दै आउनुभएको थियो ।
स्थानीय शुभकामना सप्लायर्स नामक बालुवा डिपोमा बस्दै आउनुभएका बरालले खाली ट्रक ‘ब्याक’ गर्ने क्रममा छोरी समीक्षालाई किचेको थियो । समीक्षाको घटनास्थलमै निधन भएको इलाका प्रहरी कार्यालय बनेपाले जनाएको छ ।
ट्रक प्रहरीको नियन्त्रणमा रहेको छ भने चालक सम्पर्कमै रहेको प्रहरीले जनाएको छ । मृतक बालिकाको शव पोस्टमोर्टमका लागि धुलिखेल अस्पताल लगिएको इलाका प्रहरी कार्यलय बनेपाले जनाएको हो ।
