चितवन । चितवनका जिल्ला न्यायाधिवक्ता शान्तिप्रसाद लुइँटेलले रास्वपा सभापति एवम् पूर्व गृहमन्त्री रवि लामिछाने विरुद्ध लगाएको ठगी अभियोजनको विषयलाई लिएर अनुसन्धान गर्न महान्यायाधिवक्ताको कार्यालयले छानबिन समिति गठन गरेको छ ।
नायब महान्यायाधिवक्ता गोपालप्रसाद रिजालको संयोजकत्वमा, सह न्यायाधिवक्ता सूर्यराज दाहाल, उच्च अदालत सरकारी वकिल कार्यालय हेटौंडाका सहन्यायाधिवक्ता इश्वरीप्रसाद ढकाल र महान्यायाधिवक्ताको कार्यालयका उपन्यायाधिवक्ता रुद्रप्रसाद आचार्य सदस्य रहेको छानबिन समिति बनाएको छ ।
सरकारी वकिल कार्यालयले हिजो लामिछाने सहित १५ जना विरुद्ध चितवन जिल्ला अदालतमा मुद्दा दर्ता गरेको थियो । तर सरकारी वकिलले लामिछाने विरुद्ध संगठित अपराधमा नगरी ठगी मुद्दामा मात्र मुद्दा दर्ता गरेपछि हिजो साँझ नै जिल्ला न्यायाधिवक्ता लुइँटेललाई चितवनबाट सरुवा गरिएको थियो । लुइँटेलको स्थानमा उच्च सरकारी वकिलको कार्यालय बुटवलका न्यायाधिवक्ता रवि न्यापाने चितवन आइपुग्नुभएको छ ।
