संखुवासभा । चीनको सिजाङ स्वशासित क्षेत्रको डिङ्गयी काउन्टी केन्द्रबिन्दु भएर आज बिहान ६ बजेर ५० मिनेटमा गएको ६ दशमलव ८ म्याग्निच्युडको भूकम्पका कारण सङ्खुवासभाको भोटखोला गाउँपालिका-१ किमाथाङ्कामा एक घर क्षति पुगेको छ ।
किमाथांका नाकाबाट करिब ३५ किलोमिटर टाढा केन्द्रबिन्दु भएर गएको भूकम्पले भोटखोला १ किमाथाङ्का तेनछबी भोटेको घर चर्किएको हो । जस्ता र ढुंगामाटोले बनेको २ तले घर क्षति भएको प्रहरीले जनाएको छ ।
पटकपटक भूकम्पले जमिन हल्लाएका कारण भोटखोलाको किमाथांकाबासी त्रसित रहेको भोटखोला गाउँपालिकाका अध्यक्ष वाङछेदर भोटेले बताउनु भयो । ‘किमाथांकाबाट पारीपट्टी भएका सडक भत्केको देखिन्छ,’ उहाँले भन्नुभयो, ‘नाका खुलेपछि भोटखोलाबासीको दैनिक किनमेल गर्ने थलो चाँगा र डिङ्गी बजार थियो । हामीले गाउँपालिकाका तर्फबाट पनि ५ वटै वडामा तथ्यांक संकलन गरिहेका छौं, सबै ठाउँमा पुग्नु पर्ने भएकाले खोजी गरिरहेका छौं’ ।
क्षतिको विवरण बुझ्न प्रहरी गाउँगाउँमा गइरहेको डिएसपी दक्षकुमार बस्नेतले जानकारी दिनुभयो । ‘सञ्चारको समस्या छ, हामी क्षतिका बारेमा बुझ्दैछौं,’ उहाँले भन्नुभयो ।
