काठमाडौं । पटक-पटक सरकारको ध्यानाकर्षण गर्दा पनि आफूहरुले सहकारीमा राखेको रकम फिर्ता नभएपछि देशभरका पीडितले काठमाडौं केन्द्रित आन्दोलन सुरु गरेका छन् ।
श्रम गरेर थोरै-थोरै गरी जम्मा पारेको बचत हिनामिना भएकाहरुको संख्या हजारौं छ । तर न सरकारले उनीहरुको हिनामिना भएको रकमको खोजी गरिदिएको छ न त डुबेको रकम फिर्ता दिलाइदिन कुनै पहल नै गरेको छ । यसअघि आफैंले गरेको सहमतिसमेत सरकारले कार्यान्वयन नगरेपछि पीडितहरुले राजधानी केन्द्रित आन्दोलन गर्न बाध्य भएका हुन् ।
काठमाडौंकी ६० वर्षीया महालक्ष्मी मैनाली शुक्रबार सहकारी सञ्चालकविरुद्ध माइतीघरमा सुरु भएको आन्दोलनमा उत्रनुभयो । आफूले मिहिनेत गरी जम्मा गरेको पैसा कोटेश्वरको परस्पर सहकारी संस्थाले फिर्ता नदिएपछि उहाँ आन्दोलनमा उत्रिनुभएको हो । नसासम्बन्धी समस्या, ग्यास्टिकलगायत रोगले ग्रस्त महालक्ष्मीले उपचारका लागि आफैंले जम्मा गरेको रकम फिर्ता नपाएपछि प्लेकार्ड बोकेर हिँड्नुपरेको छ ।
महालक्ष्मीजस्ता हजारौं सहकारीपीडितको समस्या उस्तै छ । दिनरात नभनि चटपटे बेचेर जम्मा गरेको पैसा गेट वे सहकारीले फिर्ता नदिएपछि समृता राई पनि फिर्ता पाउने आशामा आन्दोलनमा सहभागी हुनुभयो । आफूले जम्मा गरेको दुई लाख ५० हजार रुपैयाँ फिर्ता पाउनुपर्ने माग उहाँको छ । बचत फिर्ता नपाएपछि सन्तानलाई शिक्षा दिनसमेत उहाँलाई मुस्किल परेको छ ।
सरकारी तथ्यांकअनुसार देशभरका ३१ हजार पाँच सय सहकारीमा करिब ७० लाख बचतकर्ता छन् । तीमध्ये करिब पाँच सय सहकारीले बचत फिर्ता गरेका छैनन् । ७५ हजारभन्दा बढी बचतकर्ता न्यायका लागि रोइकराइ गरिरहेका छन् । उनीहरुलाई सहकारी बचतकर्ता संरक्षण राष्ट्रिय अभियानले एकीकृत गरेर न्याय खोज्दै शुक्रबारदेखि काठमाडौंमा उतारेको हो ।
सहकारी पीडितहरुको सहकारी बचतकर्ता संरक्षण राष्ट्रिय अभियान महासंघका अध्यक्ष कुशलभ केसीले सहकारी पीडितहरुको बचत फिर्ता नभएसम्म आन्दोलन जारी राख्ने बताउनुभयो । सरकारले दुईपटक सहकारी समस्या समाधान गर्ने सम्झौता गरे पनि कार्यान्वयन नभएकाले आफूहरू बाध्य भएर आन्दोलनमा उत्रनुपरेको उहाँको भनाइ छ ।
आन्दोलनमा सहभागी हुन देशका विभिन्न जिल्लाबाट पीडितहरु काठमाडौं आएका छन् । पोखरा, बुटवल, चितवन, नवलपरासी, धरानलगायत सहरमा सहकारीपीडितको आन्दोलन सुरु भएको हो । तर सरकारले पीडितका माग सुन्ने र सम्बोधन गर्नेतर्फ चासो दिएको छैन ।
आन्दोलन उत्कर्षमा पुग्दा सहकारी बचत पीडितसँग सम्झौता गर्ने अनि कार्यान्वयन नगर्ने सरकारको प्रवृत्तिकै कारण सहकारीको समस्या पुन: बल्झिएको हो । यस्ता समस्या समाधानका लागि सरकारले कार्यान्वयनका ठोस पहलकदमी लिनुपर्छ ।
यो पनि...
सहकारी ठगलाई कारबाहीको माग, सदनदेखि सडकसम्म चर्कियो आन्दोलन
सरकारले माग सम्बोधन नगरेको भन्दै सहकारीपीडितहरु पुनः आन्दोलित (तस्बिरसहित)
