बाँके । कोहलपुर नगर विकास समितिको जग्गा अतिक्रमण गरी निर्माण गरिएका ७ सय ५१ घर-टहरा गृह प्रशासन र स्थानीय सरकारले हटाउने भएको छ ।
सुरक्षा अधिकारीसहितको सर्वदलीय–सर्वपक्षीय बैठकले अतिक्रमित सार्वजनिक तथा सरकारी जग्गा फिर्ता गराउने निर्णय गरेको हो । गृह मन्त्रालयले पनि स्थानीय प्रशासनलाई अतिक्रमित सरकारी जग्गा फिर्ता गर्न निर्देशन दिएको छ ।
राजनीतिक आड र संरक्षणमा कोहलपुरको क्रिकेट मैदान वरपर ७ सय ५१ घर-टहरा निर्माण गरिएका छन् । करिब १५ वर्ष अघिदेखि कोहलपुर नगर विकास समितिको जग्गा अतिक्रमण हुँदै आएको हो ।
पटक-पटक बस्ती हटाउने भनिए पनि गृह प्रशासनले सहयोग नगरेकाले सम्भव भएको थिएन । तर, अहिले गृह मन्त्रालयले नै जग्गाबाट बस्ती हटाउने निर्देशन दिएकाले कोहलपुर नगरपालिकाले ७ दिनभित्र बस्ती खाली गर्न सूचना जारी गरेको छ ।
कोहलपुर नगरपालिकाका मेयर पूर्णप्रसाद आचार्यले बस्ती खाली नगरिए वा अटेर गरे बल प्रयोग गरेर भए पनि खालि गराउने चेतावनी दिनु भएको छ ।
.png&w=400&height=300)
