पाँच वर्ष अघि गण्डकी प्रदेश सरकारले प्रदेशकै गौरवको आयोजना भनी घोषणा गरेको पोखरामा अन्तर्राष्ट्रिय क्रिकेट रंगशाला निर्माणको काम अलपत्र परेको छ । झन्डै डेढ अर्ब रुपैयाँको लगानीमा बनाउने लक्ष्य राखिएको रंगशालाको विस्तृत अध्ययन प्रतिवेदन -डि पि आर तयार भएको तीन वर्ष भइसक्दा पनि काम सुरु हुन सकेको छैन ।
प्रदेश सरकारले रंगशाला निर्माणका लागि पोखराको पशुपतिघाटमा १ सय ७४ रोपनी जग्गा संघीय सरकारबाट प्राप्त गरिसकेको छ । तर लगानी स्रोत जुटाउन नसक्दा रंगशाला निर्माण कार्य अघि बढेको छैन । प्रदेश सरकारको यो आर्थिक वर्षको बजेटमा रंगशाला निर्माण प्रथामिकता मै परेन । यस अघि बर्सेनी रकम विनियोजन भए पनि काम हुन सकेको थिएन ।
रंगशाला निर्माण भएपछि पोखरामा क्रिकेटका अन्तर्राष्ट्रियस्तरका प्रतियोगिता गर्न सहज हुने अपेक्षा छ । तर काम अघि नबढ्दा आयोजनाको लागत र समय लम्बिने देखिएको छ । जग्गा प्राप्ति गरि डिपिआरसमेत भइसक्दा त्यसपछि बजेट नै विनियोजन हुन छोड्नुले कतै प्रदेश सरकार यो योजनाबाट पछि हटेको त हैन भन्ने आशंका खेल सम्बद्ध व्यक्तिहरुले गर्न थालेका छन् ।
१८ हजार दर्शक क्षमताको रंगशालामा टी-२०, एकदिवसीय र टेस्ट म्याच खेल्न मिल्ने विभिन्न सात वटा पिचसहित अन्य पूर्वाधार तयार पारिने डीपीआरमा उल्लेख छ । तीन वर्ष अघि करिव १६ लाख रुपैयाँ खर्चेर डिपिआर तयार गरे पनि त्यसपछि सरकार कै प्राथमिकतामा नपर्दा राज्यको लगानी बालुवामा पानी हुने हैन भन्ने चिन्ता थपिएको छ ।