काठमाडौं । पाकिस्तानका प्रधानमन्त्री शहबाज शरीफले भारतले पाकिस्तानबाट एक थोपा पनि पानी लिन नसक्ने चेतावनी दिनुभएको छ ।
पाकिस्तानी सेनाका प्रमुख आसिम मुनिरले केही दिनअघि भारतमा परमाणु आक्रमणको धम्की दिएको केही दिनपछि पाकिस्तानी प्रधानमन्त्री शरिफको पनि यस्तो चेतावनी आएको हो ।
इस्लामावादमा आयोजित एक समारोहमा शरिफले भारतले पाकिस्तानको पानी रोक्ने धम्की दिए एक थोपा पनि पानी खोस्न नसक्ने बताउनुभयो । भारतले यस्तो कदम चाले सबक सिकाउने र आफ्नै कान समातेर बस्नुपर्ने अवस्था आउने उहाँको भनाइ छ ।
भारतले गत २३ अप्रिलमा जम्मू-कश्मिरको पहलगाम घटनाको डिजाइन पाकिस्तानले गरेको भन्दै सिन्धु जल सम्झौता रद्द गरेको छ । पाकिस्तानले पानीको बहाब रोक्ने कुनै पनि प्रयासलाई युद्ध कार्य मानिने बताउँदै आएको छ ।
यसअघि सेना प्रमुख मुनिरले भारतले पानी बन्द गरे परमाणु बम हानेर बाँध नै भत्काइदिने चेतावनी दिनुभएको थियो । भारतले हालसम्म यसबारे कुनै प्रतिक्रिया दिएको छैन ।
