काठमाडौं । प्यालेस्टिनी सशस्त्र समूह हमासले अमेरिकाको युद्ध विरामसम्बन्धी नयाँ प्रस्ताव अस्वीकार गरेको छ । एक वरिष्ठ हमास अधिकारीले प्यालेस्टिनी सशस्त्र समूहले गाजामा युद्धविराम र बन्धक मुक्तिसम्बन्धी अमेरिकाको नयाँ प्रस्ताव अस्वीकार गर्ने बताएका हुन् ।
ह्वाइट हाउसले बिहिबार इजरायलले अमेरिकी दूत स्टिभ विट्कोफको योजनामा ‘स्वीकृति’ दिएको र अहिले हमासको औपचारिक प्रतिक्रिया कुरिरहेको जनाएको थियो ।
इजरायली सञ्चारमाध्यमहरूले इजरायली अधिकारीहरूको हवाला दिँदै जनाएअनुसार उक्त योजनाले दुई चरणमा १० जना जीवित बन्धक र १८ जना मृत बन्धकका शव फिर्ता गराउनेछ ।
यसको सट्टामा ६० दिनको युद्धविराम र इजरायली जेलमा रहेका प्यालेस्टिनी कैदीहरूको रिहाइ गरिनेछ। तर, हमास अधिकारीले उक्त प्रस्तावले युद्धको अन्त्य लगायतका मुख्य मागहरू पूरा नगरेको बताउँदै आफूहरूले उचित समयमा औपचारिक प्रतिक्रिया दिने बताए।
इजरायली सरकारले यस विषयमा कुनै टिप्पणी गरेको छैन । गत मार्च १८ मा अमेरिका, कतार र इजिप्टको मध्यस्थतामा भएको दुई महिनाको युद्धविराम विफल भएपछि इजरायलले गाजामा पूर्ण नाकाबन्दी लगाएर पुनः हमासमाथि सैनिक कारबाही सुरू गरेको थियो। अझै पनि हमासले नियन्त्रणमा राखेका ५८ जना बन्धकमध्ये कम्तीमा २० जना जीवित रहेको विश्वास इजरायलको छ ।
गाजामा पछिल्ला १० हप्तामा करिब ४ हजार मानिसको ज्यान गएको हमासद्वारा सञ्चालित स्वास्थ्य मन्त्रालयले जनाएको छ। संयुक्त राष्ट्रसंघका अनुसार इजरायली स्थल कारबाही र खाली गराउने आदेशका कारण थप ६ लाख मानिस पुनः विस्थापित भएका छन। यसैबीच इजरायली आक्रमणमा परी गाजा पट्टीमा हिजो एकै दिन कम्तीमा ४४ जनाको मृत्यु भएको छ ।
