काठमाडौं । स्पेनका राजा फिलिप र रानी लेटिजियाले भ्यालेन्सियाको बाढीग्रस्त क्षेत्रको भ्रमण गर्ने क्रममा जनताको विरोधको सामना गर्नुपरेको छ ।
भ्यालेन्सियाको बाढीग्रस्त क्षेत्रको भ्रमणको क्रममा स्पेनका राजा फिलिप र रानीमाथि आक्रोशित प्रदर्शनकारीहरुले बाढी कै माटो र अन्य वस्तुले प्रहार गरेको बीबीसीले जनाएको छ । बाढी प्रभावित जनताले आक्रोश देखाएपछि राजाले आफ्नो अर्को भ्रमण रद्द गरेको बताइएको छ ।
भ्यालेन्सियामा राजा फिलिपविरुद्ध आम जनताले गरेको विरोधपछि त्यहाँका राष्ट्रपति कार्लोस माजेनले जनताको क्रोध र प्रतिक्रिया बुझेको र जनताको गुनासो सुन्नु आफ्नो राजनीतिक र नैतिक दायित्व भएको बताउनुभएको छ ।
यसअघि स्पेनका प्रधानमन्त्री पेड्रो सान्चेज र उहाँको टोलीलाई भ्यालेन्सियाको पिपोर्टाबाट सकुशल निकालिएका थिए । वर्षा र बाढीका कारण क्षतीग्रस्त भ्यालेन्सिया भ्रमण गर्ने क्रममा उहाँ माथि पनि आक्रोशित जनताले विरोध जनाउँदै माटोले आक्रमणको प्रयास पनि गरेको बताइएको छ ।
स्पेनमा दशकौँ पछि आएको बाढीले करिब २ सय १४ जना भन्दा बढीको मृत्यु भइसकेको छ भने लाखौँ मानिस अझ प्रधावित छन् । यस विषयमा राज्यले कुनै पहल र आवश्यक कदम नचालेको भन्दै त्यहाँका जनता आक्रोशित भएर राज्य प्रमुखहरुमाथि आक्रमण गरेको टिप्पणी भइरहेको छ ।
यसैबीच, स्पेनको राष्ट्रिय मौसम विज्ञान एजेन्सीले भ्यालेन्सियाको दक्षिणी भागहरूमा वर्षा हुने भन्दै आगामी केही घण्टाका लागि रेड अलर्ट जारी गरेको छ।
