काठमाडौं । इजरायलले लेबनान र सिरियासँग जोडिएको क्षेत्रमा ७५ वटा हिजबुल्लाह समूहको ठेगानालक्षित हमला सुरु गरेको छ । पश्चिमा राष्ट्रहरूले इजरायल र हिजबुल्लाहबीच २१ दिने अस्थायी युद्धविरामको प्रस्ताव अघि सारेको केही घण्टापछि इजरायली सेनाले पुनः आक्रमण गरेको हो ।
पछिल्लो आक्रमणमा २६ जनाको मृत्यु भएको छ । मृत्यु हुने अधिकांश महिला र बालबालिका छन् । इजरायलले गरेको आक्रमणको प्रतिकार गर्दै हिजबुल्लाहले ४५ वटा रकेट प्रहार गरेको छ । त्यसमध्ये केही रकेटलाई बीचमै ध्वस्त पारिएको दाबी इजरायली सेनाले गरेको छ ।
इजरायलले सोमबार यता गरेको आक्रमणबाट झन्डै ६ सय मृत्यु भइसकेको लेबनानी स्वास्थ्य मन्त्रालयले जनाएको छ । अन्तर्राष्ट्रिय दबाबका बीच पनि दुवै पक्षले सीमावर्ती क्षेत्रमा भिडन्त जारी राखेका हुन् । इजरायलले उत्तरी क्षेत्रबाट हिजबुल्लाह नहटेसम्म आक्रमण जारी राख्ने चेतावनी दिएको छ ।
युद्ध भड्किँदै गएपछि सीमावर्ती क्षेत्रका ९० हजारभन्दा बढी बासिन्दा पलायन भइसकेको संयुक्त राष्ट्रसंघले जनाएको छ ।
यसैबीच इजरायली प्रधानमन्त्री बेन्जामिन नेतन्याहूले लेबनानमा पूर्णशक्तिका साथ आक्रमण जारी राख्न सेनालाई निर्देशन दिनुभएको छ । राष्ट्रसंघको महासभालाई सम्बोधन गर्न अमेरिका प्रस्थान गर्नुअघि प्रधानमन्त्री नेतन्याहूले लेबनानमाथी पूर्ण शक्तिका साथ आक्रमण गर्न सेनालाई आदेश दिनुभएको हो ।
यता महासभाको साइडलाइनमा भने दुवै पक्षबीचको युद्धलाई मत्थर पार्ने अमेरिकाको तयारी छ । गाजा युद्ध विरामलाई अगाडि बढाउन नेतन्याहूसँग अमेरिकाले छलफल गर्ने बताइएको छ । तर इजरायली विदेश मन्त्री इजरायल काट्जले भने युद्धविराम नहुने स्पष्ट पार्नुभएको छ ।
