काठमाडौं । भारतको जम्मु-कश्मीरमा १० वर्षपछि विधानसभा चुनाव हुँदैछ । केन्द्र सरकारले धारा, ३७० हटाएपछि पहिलो पटक जम्मु-कश्मिरमा विधानसभा चुनाव भइरहेको हो ।
विधानसभा चुनाव अन्तर्गत २४ सिटका लागि पहिलो चरणको मतदान आज बिहान ७ बजेबाट सुरु भएर साँझ ६ बजे सकिनेछ । आज कश्मिरको १६ र जम्मुको ८ विधानसभाका लागि मतदान भइरहेको हो ।
जम्मु-कश्मीर विधानसभा चुनावको पहिलो चरणमा २ सय १९ उम्मेदवार मैदानमा छन् ।
धारा, ३७० हटाएपछि पहिलो पटक हुन लागेको विधानसभा चुनावमा राजनीतिक दलसँगै मतदातामा पनि उत्तिकै उत्साह देखिएको छ ।
निर्वाचन आयोगले दिएको जानकारी अनुसार केन्द्र शासित प्रदेशका ९० निर्वाचन क्षेत्रमा ८७ लाख ९ हजार मतदाता छन् । जसमध्ये ४२ लाख ६० हजार महिला छन् । यहाँ पहिलो पटक मतदान गर्ने युवा मतदाताको संख्या ३ लाख ७१ हजार छ भने २० देखि २९ वर्ष उमेर समूहका २० लाख ७ हजार मतदाता छन् ।
चुनावमा नेशनल कन्फ्रेन्स र भारतीय कांग्रेस मिलेर राज्यका सबै ९० सिटमा संयुक्त प्रतिस्पर्धा गरिरहेका छन् । उता भाजपा र पीडीपी यस चुनावी मैदानमा एक्लै ओर्लिएका छन् ।
आयोगका अनुसार जम्मु-कश्मीरमा ३ चरणमा मतदान हुनेछ । दोस्रो चरणका लागि सेप्टेम्बर २५ मा र तेस्रो तथा अन्तिम चरणका लागि अक्टोबर १ मा मतदान हुनेछ। मतदानको नतिजा अक्टोबर ८ मा घोषणा हुने निर्वाचन आयोगले जनाएको छ ।