काठमाडौं । भारतको केरलस्थित वायनाडमा भारी वर्षापछि गएको बाढी-पहिरोमा परी बालबालिकासहित ५० जनाको मृत्यु भएको छ । मृत्यु हुनेमा एक नेपाली बालक पनि रहेको भारतीय सञ्चारमाध्यमले जनाएका छन् ।
मंगलबार बिहान २ बजे गएको वायनाडको मोप्पाडीस्थित थोन्डरनाड क्षेत्रमा नेपाली परिवारका १ वर्षीय बालकको मृत्यु भएको हो । पहिरोमा एक सय जनाभन्दा बढी पुरिएको समाचारमा जनाइएको छ । तर, सरकारी अधिकारीहरुले कति जना पुरिएका छन् भन्ने यकिन तथ्यांक नभएको जनाएका छन् ।
स्वास्थ्यमन्त्री विना जर्जका अनुसार पहिरोमा पुरिएकाहरुको खोजीका लागि स्थल तथा जल सेना परिचालन गरिएका छन् । मृतकको संख्या अझै बढ्न सक्ने अधिकारीहरुको भनाइ छ । २५० जनाभन्दा बढीको उद्धार गरिएको छ ।
केरलकी मुख्यसचिव वेणुका अनुसार पटक-पटक गएको पहिरोका कारण घाइते भएका १६ जनालाई मेप्पाडी अस्पतालमा भर्ना गरिएको छ । मुख्यमन्त्री पिनाराई विजयनले उद्धारमा सबै सरकारी संयन्त्र सक्रिय भएको जनाउनुभएको छ ।
प्रधानमन्त्री नरेन्द्र मोदीले मृतकका आफन्तलाई प्रधानमन्त्री राहत कोषबाट प्रतिव्यक्ति दुई लाख रुपैयाँ क्षतिपूर्ति दिने घोषणा गर्नुभएको छ । यसका साथै ५० हजार रुपैयाँ दिइने घोषणा गरिएको छ ।
यस्तै, राष्ट्रपति द्रौपदी मुर्मू, वायनाडका सांसद राहुल गान्धी, कांग्रेस नेता प्रियंका गान्धीलगायत नेताहरुले उद्धारलाई प्रभावकारी बनाउन सरकारसमक्ष आग्रह गर्नुभएको छ । केरलको विपद् व्यवस्थापन विभागले गत ३० जुलाईमै वायनाडसहित कोझीकोड, मल्लापुरम तथा कन्नुरमा रेड अलर्ट जारी गरेको थियो । मौसम विभागले उक्त क्षेत्रमा गत चौबीस घण्टामा २०४ मिलिमिटर पानी परेको जनाएको छ ।
