काठमाडौं । दक्षिणपश्चिम चीनस्थित सिचुआन प्रान्तको जिगोङ सहरमा रहेको १४ तले एक सपिङ मलमा आगलागी हुँदा १६ जनाको मृत्यु भएको छ । आगलागीमा परी फसेका थुप्रै मानिसहरु मलको बालकनीमा जम्मा भएका थिए ।
दमकल विभागले घटनास्थलमा करिब तीन सय आपतकालीन उद्धारमा खटिने कर्मचारी र एम्बुलेन्ससहित दर्जनौं सवारी साधन पठाएपछि करिब ३० जनालाई आगोबाट बचाइएको अन्तर्राष्ट्रिय सञ्चार माध्यमले जनाएका छन् । उक्त मलमा लागेको आगोलाई दमकल विभागका कर्मचारीले नियन्त्रणमा लिएका थिए ।
निर्माण कार्य जारी रहेको कारण उक्त मलमा आगलागी भएको प्रारम्भिक अनुसन्धाले देखाएको छ । चीनको आपतकालीन व्यवस्थापन मन्त्रालयले बिहीबार एक विज्ञप्ति जारी गर्दै उद्धारकर्मी र प्रान्तीय अधिकारीहरूलाई आगलागीको ठोस कारण पत्ता लगाउन आग्रह गरेको छ ।
जनवरीमा दक्षिणपूर्वी चीनस्थित रहेको भवनमा आगलागी हुँदा कम्तिमा ३९ जनाको मृत्यु भएको थियो भने केही दिनपछि मध्य हेनान प्रान्तको एउटा बोर्डिङ स्कुलमा आगलागी हुँदा १३ बालबालिकाको मृत्यु भएको थियो ।
