जबलियाको दोहोरो भिडन्तमा केही इजरायली सुरक्षाकर्मीहरु बन्धक बनाइएको हमासको दाबी

काठमाडौं । हमासको एक समूहका अनुसार जबलियामा भएको दोहोरो भिडन्तमा केही इजरायली सुरक्षाकर्मीहरु बन्धक बनाइएका छन् । तर इजरायली सेनाले त्यस भनाइमा सत्यता नरहेको जनाएको छ ।

हमासका प्रवक्ताका अनुसार केही इजरायली सुरक्षाकर्मीहरु बन्धक बनाइए पनि संख्या भने बताइएको छैन । यसैबीच इजरायल र हमासबीच वार्ताको नयाँ चरण आउने हप्ता प्रारम्भ हुने बताइएको छ । मोसाद इन्टेलिजेन्स एजेन्सीका प्रमुखले अमेरिकी सीआईए प्रमुख र कतारका प्रधानमन्त्रीसँग भेटेपछि हमाससँग वार्ता गरिने भएको हो ।

हमासका एक अधिकारीले भने इजरायलसँग गरिने वार्ताको कुनै मिति तय नभएको बताएका छन् । गाजामा युद्धको सात महिना बितिसक्दा पनि मध्यस्तकर्ताहरुले एक साझा समझदारीको वातावरण बनाउन सकेका छैनन् । अक्टोबर ७ को हमासको हमलापछि इजरायलले गरेको जवाफी हमलामा झन्डै ३६ हजार प्यालेस्टिनीको मृत्यु भइसकेको गाजाको स्वास्थ्य मन्त्रालयले जनाएको छ । नेपाली विद्यार्थी बिपिन जोशी अझै पनि हमासको नियन्त्रणमै छन्।