काठमाडौं । इजरायलले गाजामा गरेको पछिल्लो हवाई आक्रमणमा अन्तर्राष्ट्रिय गैर सरकारी संस्था- वर्ल्ड सेन्ट्रल किचेनका कम्तीमा पाँच कर्मचारीको मृत्यु भएको छ ।
हमासद्वारा सञ्चालित गाजा सरकारको सञ्चार कार्यालयका प्रवक्ताका अनुसार मृत्यु हुनेमा पोल्यान्ड, अस्ट्रेलिया, बेलायत र एक प्यालेस्टिनी नागरिक रहेका छन् । इजरायलले उक्ता घटनाप्रति दुःख व्यक्त गर्दै विस्तृत विश्लेषण गरिरहेको बताएको छ ।
वर्ल्ड सेन्ट्रल किचेनले खाद्य अभाव झेलिरहेकाहरुलाई खाद्यान्न र तयारी खाजा उपलब्ध गराउँछ। वर्ल्ड किचनले गत महिना जारी गरेको विज्ञप्तिमा पछिल्ला १ सय ७५ दिनमा चार करोड २० लाख खाजा उपलब्ध गराएको जनाइएको छ । हेइटीमा भएको भयानक भूकम्पपछि पीडितहरूका लागि खाद्यान्न र भान्छे पठाएर शेफ होजे एन्ड्रेसले सन् २०१० मा वर्ल्ड सेन्ट्रल किचेन प्रारम्भ गरेका थिए ।
स्थापनायता सो संस्थाले प्राकृतिक प्रकोपबाट प्रभावित समुदाय, अमेरिकी सीमामा रहेका आप्रवासी, कोरोना महामारीका बेला स्वास्थ्यकर्मी तथा युक्रेन र गाजामा युद्ध पीडितहरूलाई खाद्यान्न र तयारी खाजा उपलब्ध गराउँदै आएको छ ।
