काठमाडौं । अमेरिकी पत्रिका ‘वाल स्ट्रिट जर्नल’ ले रुसी हिरासतमा रहेका आफ्ना पत्रकार इभान गेर्शकोभिचको सम्मानमा शुक्रबार पत्रिकाको पहिलो पृष्ठ खाली राखेको छ । पत्रकार इभान एक वर्षदेखि रुसी कारागारमा छन् ।
रुसी राष्ट्रपति भ्लादिमिर पुटिनले विदेशमा रहेका रुसी कैदीको बदलामा गेर्शकोभिचलाई रिहा गर्न सकिने बताए पनि अहिलेसम्म यस विषयमा कुनै सम्झौता हुन सकेको छैन ।
यही विषयलाई लिएर अमेरिकी राष्ट्रपति जो बाइडेनले यसको मूल्य रुसले चुकाउनुपर्ने बताएका छन् । तर, रुसी अदालतले पत्रकार इमानलाई ३० जुनसम्म हिरासतमा राख्न आदेश जारी गरेको छ ।
३२ वर्षीय अमेरिकी पत्रकार इभान रिपोर्टिङका क्रममा सन् २०२३ मा मस्को गएका थिए । सोही क्रममा मस्को प्रहरीले उनलाई जासुसी गरेको भन्दै हिरासतमा लिएको थियो । सन् १९८६ पछि रुसले पहिलोपटक जासुसी गरेको आरोपमा अमेरिकी पत्रकारलाई नियन्त्रणमा लिएको हो ।
