काठमाडौं । इजरायली सेनाले गाजास्थित संयुक्त राष्ट्रसंघको कार्यालय प्रांगणमा हमासको सुरुङ फेला पारेको जनाएको छ ।
इजरायली सेनाका अनुसार सुरुङ सात सय मिटर लामो र अठार मिटर गहिरो छ । सुरुङभित्रै फराकिला कार्यकक्ष पनि भेटिएको दाबी इजरायली सेनाको छ । एउटा ठूलो कोठामा कम्प्युटर सर्भर जडान गरिएको छ ।
यो सुरुङ भेटिनुबाट हमासले राष्ट्रसंघीय उद्धार निकायको दुरुपयोग गरेको पुष्टि भएको दाबी पनि इजरायलको छ । प्यालेस्टिनीहरुले भने इजरायलले राष्ट्रसंघको बदनाम मात्र गरेको जवाफ दिएका छन् ।
जर्मनी, बेलायत र अमेरिकासहित ९ मुलुकले प्यालेस्टाइनस्थित संयुक्त राष्ट्रसंघीय राहत तथा उद्धार निकायलाई हमासका लडाकुले दुरुपयोग गरेको इजरायली आरोपमा यसअघि नै अनुदान स्थगन गरेका थिए ।
राष्ट्रसंघले पनि आफ्ना बाह्र जना कर्मचारीलाई बर्खास्त गरेर अनुसन्धान गरिरहेको छ ।
