काठमाडौं । पाकिस्तानमा आज आम निर्वाचन हुँदैछ । स्थानीय समय अनुसार बिहान ८ बजेदेखि मतदान सुरु भएको छ ।
पाकिस्तानमा ३ सय ३६ सदस्यीय नेसनल एसेम्बलीमा २ सय ६६ जना प्रत्यक्ष निर्वाचित हुने व्यवस्था छ । निर्वाचनमा दल र स्वतन्त्रका गरी ५ हजार १ सय २१ उम्मेदवार मैदानमा छन् । ६० सिट महिला र १० सिट गैरमुस्लिमका लागि आरक्षित छ । आरक्षित सिटको निर्वाचन भने समानुपातिक निर्वाचन प्रणालीबाट हुने गर्दछ ।
देशका चार वटै प्रान्तमा गरी ९० हजार ६ सय ७५ मतदान केन्द्र स्थापना गरिएको छ । २४ करोड १० लाख जनसंख्या रहेको पाकिस्तानमा १२ करोड ८० लाख मतदाता छन् ।
निर्वाचनको सुरक्षाका लागि ५ लाख ११ हजार प्रहरी, १ लाख ३७ हजार सैनिक र अर्धसैनिक बलका सुरक्षाकर्मी परिचालन गरिएको छ । मतदानस्थलको सुरक्षाका लागि सीसीटीभीसमेत जडान गरिएको सरकारी अधिकारीहरुले बताएका छन् ।
तर, निर्वाचनको एक दिनअघि बुधबार दक्षिणपश्चिमी प्रान्त बलोचिस्तानमा भएका दुई बेग्लाबेग्लै विस्फोटमा २८ जना मारिएपछि सुरक्षा चुनौती थपिएको अन्तर्राष्ट्रिय सञ्चार माध्यमले उल्लेख गरेका छन् ।
