काठमाडौं । युद्धग्रस्त गाजामा मानवीय संघर्षविराम गर्न राष्ट्रसंघ सुरक्षा परिषद्मा राखिएको प्रस्ताव असफल भएको छ । अमेरिकाले भिटो अर्थात् विशेषाधिकार प्रयोग गरेपछि प्रस्ताव पारित हुन नसकेको हो । बेलायत भने मतदानमा अनुपस्थित रह्यो ।
यद्यपि प्रस्तावका पक्षमा १३ मुलुकले मत दिएका छन् । गाजामा मानवीय संघर्षविराम गर्ने प्रस्ताव पारित हुन नसकेपछि राष्ट्रसंघसहित अन्तर्राष्ट्रिय मानवअधिकार निकायहरूले अमेरिकाको विरोध गरेका छन् ।
ह्युमन राइट्स वाचले यो निर्णयबाट अमेरिका युद्ध अपराधमा संलग्न हुने खतरा बढेको चेतावनी दिएको छ । सहायता निकाय अक्सफामले पनि यसले अमेरिकी मानव अधिकार विश्वसनीयतामै आँच पुगेको बताएको छ ।
राष्ट्रसंघका लागि इजरायली राजदूत गिलार्ड एर्दानले भने सुरक्षा परिषद्को प्रस्ताव रोकेर आफ्नो पक्षमा देखाएको ऐक्यबद्धताप्रति अमेरिकी राष्ट्रपति जो बाइडनलाई धन्यवाद दिएका छन् । बन्धकको मुक्ति र हमास ध्वस्त भएपछि मात्रै युद्धविराम सम्भव भएको उनको भनाइ छ ।
